Cəvahir Səlimqızı
“Bu gün ən çox tənqid olunan kimdir” sualına yəqin, hamı bir ağızdan cavab verər ki, şou əhli. Az qalıb ki, qlobal istiləşmənin səbəbini də onların ayağına yazsınlar. Bununla onların aydan arı, sudan duru olduqlarını söyləmək fikrində deyiləm, əsla, sadəcə məsələyə bir qədər fərqli prizmadan yanaşmaq istəyirəm.
Bu gün şou əhlinin yaratdığı əcaib mənzərə səbəb yox, nəticədir. Bu nəticəni də demək olar ki, gecə-gündüz baltalayırlar.Odur ki, diqqətləri bir qədər səbəb tərəfə yönəldək. Bu fikirləri paylaşmağıma səbəbsə elə şou əhlinin tüğyan elədiyi ATV telekanalında yayımlanan “Canlı səs” proqramı oldu. Daha doğrusu bu proqramda vokalçıların yarışması.
Əvvəla, vokal sənəti akademik sənət nümunəsi olaraq məhdud tamaşaçı çevrəsinə hesablanıb və dünya miqyaslı ən məşhur tenorlar, sopranoların adlarını bilənlərin sayını barmaqla saymaq olar. Məşhur vokalçılardan şou-biznes layihələrində görünən, kütləvi piara imza atan nümunələr də var. Türkiyənin ən güclü səslərindən olan Sertab Erenerin hansı operada hansı partiyaları ifa etdiyi heç kim bilməsə də, onun ifa etdiyi pop musiqilərin melodiyalarını, adlarını demək olar ki, hamı bilir.
İndi isə gələk Samirlə Ülvinin yarışmasına. Daha çox qalmaqallı sənətçi kimi tanınan Ülvi sərt açıqlamaları ilə yadda qalsa da, səs imkanlarını Xumar Qədimova ilə oxuduğu «Məhəbbət nəğməsi» adlı duetdə göstərə bildi, bununla da Ülvi Qılınc adını gündəmə yazdı. Bu yanaşma proqram boyu da özünü göstərdi.
Məhz Xumar Qədimova ilə oxuduğu layihədən sonra diqqətləri üzərinə çəkən Samir Cəfərov da maraqlı açıqlamaları ilə yadda qaldı. Vokalçıların estrada musiqisinə müraciətini dolayısıyla lazımlı olduğunu bildirən Samir “Sevgi harayı”nı məmnuniyyətlə ifa etdiyini söylədi.
Veriliş boyu bütün sual-cavablar demək olar ki, vokalçıların dueti ətrafında idi və proqram sanki Xumar Qədimovanın fonunda cərəyan edirdi. Maraqlıdır , niyə məhz Xumar Qədimova? Niyə iki Koroğluya bir Nigar?Vokalçıların hədəfi piar, gündəm olsa da, nəticə etibarilə səs imkanlarını güclü sənət nümunəsilə uzlaşdırmaq məcburiyyətindədirlər və bu seçim imkanın nə qədər məhdud olması da göz önündədir. Bu nüans proqram boyu sətiraltıolaraq vurğulandı. Heç bir ifaçı Xumar Qədimovanı nə ağızdolusu tərifləmədi, nə də onu bir nömrə, diva adlandırmadı. Həmçinin Samir Cəfərov bu titul sahiblərini dolayısıyla bəyənmədiyini dedi: “Ad açıqlamayacam, mənəxalq və əməkdar artistlərdən çox müraciətlər olsa da, mən hələ müsbət cavab verməmişəm”.
Vokal sənətində böyük uğurları olan əməkdar artist Samir Cəfərov daha bir açıqlamasında Xumar Qədimovanın kompozisiyasını Fikrət Əmirovdan sonra bu janrda işlənmiş ikinci nümunə adlandırdı.
Görünən məqam və həm də sözümün canı bundadır ki, bu gün gündəm çoxlarına lazımdır. Gündəm naminə sənəti olmayıb ucuz piarla özlərini gülünc vəziyyətə salanlar da var, düzgün seçim edib keyfiyyətli işlərə imza atanlar da. Elə Samir Cəfərovun Xumar Qədimova ilə işbirliyi kimi.
Hər halda, gündəmdə qalmaq üçün bu metoddan da istifadə etməyə dəyər. (merkez.az)
