Qazilər sosial-psixoloji dəstək layihəsinə cəlb olunublar

GƏNCLİK
15:10 22.04.2021
1180
"Böyük Qayıdış” Gənclər Təşkilatı Vətən müharibəsi qazilərinə sosial dəstək tədbirləri çərçivəsində Azərbaycan Respublikasının Gənclər Fondunun (AZGF) dəstəyi və Sosial Xidmətlər Agentliyinin tərəfdaşlığı ilə gənc qazilər üçün sosial-psixoloji dəstək layihəsi keçirib.

AZGF-dan AZXEBER.COM-a bildiriblər ki, tərəfdaş qurumların nümayəndələri, layihənin ekspert və qonaqları, gənclər təşkilatlarının nümayəndələrinin iştirakı ilə Gənclərin Resurs Mərkəzində baş tutan layihədə 5 gün ərzində 10 görüş təşkil olunub. Bakıda yaşayan və sosial-psixoloji reabilitasiyaya ehtiyacı olan gənc qazilər peşəkar təlimçilərin iştirakı ilə motivasiya, psixoloji dəstək təlimləri və tanınan simaların iştirakı ilə motivasiya xarakterli görüşlərdə iştirak ediblər.

Növbəti mərhələdə layihənin paytaxtla yanaşı, regionlarda da icrası planlaşdırılır.

Həmçinin "Böyük Qayıdış” Gənclər Təşkilatı tərəfindən qazilərlə bağlı məşğulluq, qeyri-formal təhsil, ixtisasartırma, fərdi inkişaf və asudə vaxtın səmərəli təşkili sahələrində layihələrin keçirilməsi də nəzərdə tutulur.

"Böyük Qayıdış” Gənclər Təşkilatının məqsədi Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində qazandığı şanlı Zəfər tarixinin gənclər arasında təbliğ edilməsi, Vətən müharibəsi qəhrəmanlarının, şəhid və qazilərinin cəmiyyətdə tanıdılması, işğaldan azad olunmuş torpaqların dirçəldilməsi prosesinə gənclərin səfərbər edilməsi, işğalın fəsadlarının, Azərbaycan həqiqətlərinin beynəlxalq aləmdə tanıdılması, həmçinin Vətən müharibəsində iştirak edən gənclərin maraqlarının dəstəklənməsi təşkil edir.

Proqrama qoşulmaq və təşkilatın gələcək layihələrində iştirak etmək istəyən gənclər "boyukqayidish.az” saytı və ictimai birliyin sosial media hesabları və ya [email protected] elektron poçt ünvanı vasitəsilə əlaqə yarada bilərlər.

 


OXŞAR XƏBƏRLƏR