Qlobal iqtisadi və geosiyasi proseslərin təsiri ilə qızıl bazarında dalğalanmalar davam edir. Son günlərdə qızılın qiymətində müşahidə olunan dəyişikliklər fonunda fyuçers bazarında da azalma qeydə alınıb. Aprelin 15-nə olan məlumata əsasən, Nyu-Yorkun COMEX əmtəə birjasında qızılın bir troya unsiyası üzrə 2026-cı ilin iyun fyuçerslərinin dəyəri 0,24% geriləyərək 4838,65 ABŞ dolları təşkil edib.
İqtisadçı Asif İbrahimov AZXEBER.COM-a açıqlamasında deyib ki, belə azalmalar qlobal maliyyə bazarlarında baş verən qısamüddətli dalğalanmaların nəticəsidir:kimi qiymətləndirilə bilər.
"Əmtəə bazarlarında qızılın qiymətində müşahidə olunan 0,24%-lik azalma qlobal maliyyə bazarlarında baş verən qısamüddətli dalğalanmaların nəticəsi kimi qiymətləndirilə bilər. Nyu-Yorkun COMEX əmtəə birjasında 2026-cı ilin iyun fyuçersləri üzrə qiymətin 4838,65 ABŞ dollarına enməsi bazarda fundamental dönüşdən daha çox texniki düzəliş xarakteri daşıyır. Hazırkı qiymət azalması isə əsasən ABŞ dollarının möhkəmlənməsi, investorların mənfəət realizasiyası və qlobal risk gözləntilərində nisbi yumşalma ilə bağlıdır. Federal Reserve tərəfindən faiz siyasətinə dair sərt mövqenin qorunması qızıl kimi gəlir gətirməyən aktivlərə olan marağı qısamüddətli dövrdə zəiflədə bilər”.
O qeyd edib ki, qızıl bazarı ənənəvi olaraq yüksək volatilliklə seçilir:
"Qızıl bazarı ənənəvi olaraq yüksək volatilliklə seçilir və belə kiçik faiz dəyişiklikləri bazarın təbii davranışının tərkib hissəsidir. Mövcud geosiyasi risklər, xüsusilə də Yaxın Şərqdə davam edən gərginliklər və qlobal inflyasiya təzyiqləri fonunda qızılın qiymətinin orta və uzunmüddətli perspektivdə dəstək tapmaq ehtimalı qalmaqdadır. Azərbaycana təsir baxımından isə bu dəyişikliklərin birbaşa makroiqtisadi təsiri məhduddur. Lakin dolayı olaraq daxili zərgərlik bazarında qiymətlərdə qismən yumşalma, həmçinin investorların yığım alətləri üzrə seçimlərində müəyyən dəyişikliklər müşahidə oluna bilər”.
Şahanə Ziyad
