"Futbolçularımı təbrik edirəm. Çox vacib olan 3 xalı qazandılar. Oyunda yaxşı sürət və dinamika gördüm".
Bunu "Qarabağ"ın baş məşqçisi Qurban Qurbanov evdə "Şamaxı"ya 4:0 hesabı ilə qalib gəldikləri Premyer Liqanın IV tur oyunundan sonra mətbuat konfransında deyib.
50 yaşlı mütəxəssis ilk hissənin bir az çətin keçdiyini bildirib: "Hər futbolçu üçün təcrübə toplamaq çox lazımdır. Cavid Hüseynova uğurlar arzulayıram. Yerli futbolçulara şans verirlər".
Qurbanov Avropa Liqasındakı təqvimləri barədə danışıb: "Bunları normal qarşılayıram. Sonda hər biri ilə oynamalıyıq. Ev və ya səfər matçı bir o qədər də seçilmir. Oyunçular daha çox təcrübə toplayıblar və azarkeş səs-küyünə hazır olublar".
Təcrübəli baş məşqçi bütün turnirlərdə maksimum nəticə göstərmək istədiklərini vurğulayıb: "Çempionlar Liqasının qrup mərhələsinə düşmək üçün şansımız var idi. Amma alınmadı və ruhdan düşmdürük. UEFA Avropa Liqasında öz istədiklərimizi həyata keçirmək istəyirik. Əvvəl də belə komandalara qarşı oynamışıq. Qrup mərhələsindən çıxmaq üçün şansımız var. Amma rəqiblər də iddialıdır. Bəlkə onlar da bizimlə düşdükləri üçün sevinirlər".
Mütəxəssis komandada ab-havanın normal olduğunu sözlərinə əlavə edib: "Baş verənləri geridə qoymaq istəyirik. "Viktoriya!"ya uduzduğumuz üçün məyus olmuşuq. Futbolçular həmin matçdan sonra təsirlənmişdi. Bizim üçün hər mat sanki pley-off qarşılaşması idi. Futbolçular qalib gəlmək üçün əziyyət çəkmişdilər. Amma bir addımlığında dayandılar. Bu. futbolun yazılmamış qanunlarıdır. Bunu yaşamaq oyunçunu daha da böyüdür və inkişaf etdirir. Tez toparlanıb irəli baxmaq lazımdır".
Qurbanov Şahruddin Məhəmmədəliyevin durumu haqqında danışıb: "O, hazırda çox dilxordur. Bu, onun məsuliyyətindən xəbər verir. Deməli, o insan işində məsuliyyətlidir və daha yaxşı olmaq, böyümək istəyir. Sabah mən də səhv edə bilərəm və bu da müzakirə mövzusu ola bilər. Azarkeşlər oyundan sonra aqressiv və emosional olurlar. Şahruddini indidən sonra da sevəcəklər".
