Rəşad Sadıqov başına gələnləri danışdı

İDMAN
13:10 16.02.2011
1883

“Əskişəhərspor”la Azərbaycanda “transfer pəncərəsi”nin bağlanmasının son günündə yollarını ayıran 29 yaşlı müdafiəçi bu gün keçirdiyi mətbuat konfransında başına gələnlərdən danışıb: “Bu komandaya keçidimlə bağlı sabiq baş məşqçi Rza Çalımbayla bir neçə dəfə telefon danışığımız oldu. O, mərkəz müdafiəçisinə ehtiyacı böyük olduğundan, məni sərəncamında görməkdə israr edirdi. Ancaq Çalımbay məni bir görüşdə belə oynatmadı. Bunun niyə belə olduğunu hələ də anlaya bilmirəm. Həmişə demişəm ki, Azərbaycan futbolunun inkişafı üçün nə qədər çox legionerlərimiz olsa, bir o qədər yaxşıdır. Bu sözlərimi təkzib etmirəm. Bu mənada geri qayıtmağımız futbolumuz üçün daha çox mənfi haldır”.

Bülənt Uyğunun gəlişindən sonra “Əskişəhərspor”da 5 oyun keçirən Rəşad elə onun vaxtında gedəsi oldu. Sadıqovun sözlərinə görə, Türkiyədə olduğu müddətdə “Qarabağ”ın vitse-prezidenti Tahir Gözəl ona dönüşünün təklif etsə də, qərar verməkdə tələsməyib: “Ümid edirdim ki, “Qalatasaray”a 2:4 hesablı məğlubiyyətdən sonra Uyğun mənə şans verəcək. Ancaq baş məşqçimlə son söhbətim qərarıma təsir etdi. Uyğunun sözündən belə çıxdı ki, cari mövsümdə heç bir məqsədləri yoxdur, yayda 2 mərkəz müdafiəçisi alacaq, mövqeyimdə oynayan Nadareviçin də qalacağı dəqiq deyil. Mən də qalan görüşlərdə bəlkə kimsə zədələnsə, yaxud cəzalansa oynadım. Mövqeyim elədir ki, orada adətən tez-tez dəyişiklik olmur. Klub prezidenti məni buraxmaq istəmirdi. Ancaq Uyğunun gedişimə asanlıqla razılıq verməsi mənim üçün gözlənilməz oldu və açığı, pisimə gəldi”.

Bundan sonra “Əskişəhərspor”da qalmamağı qətiləşdirən Sadıqov oyun praktikasının vacibliyindən danışıb: “Qış fasiləsindəki yoxlama matçlarında ən çox mən oynasam da, rəsmi görüşlərdən kənarda qaldım. Tərslikdən indiyə kimi Türkiyədə oynadığım klublarda zədə aldıqdan sonra ehtiyatda qalan futbolçular əvəzimə oynayaraq, möhkəmlənirlər. “Əskişəhərspor”da mövqeyimdə oynayan Dieqo İtaliya təcrübəsi olan güclü müdafiəçidir. Ancaq Nadareviçdən özümü zəif saymıram. Sadəcə, məndən hündür olduğundan, “ikinci mərtəbə”də üstün idi. Bu mənada fiziki hazırlıq yox, fiziki göstəricilərlə bağlı problemim olub. Oyun praktikası korluq çəkməyim yığmada özünü göstərəcəkdir. Macarıstan yığması ilə yoldaşlıq görüşündə özümü tanıya bilmədim”.

Rəşad “Qarabağ”a dönmək üçün “Əskişəhərspor”a pul ödəməli olub: “Onların sentyabrından mənə verəcəkləri vardı. Bunu 1 həftə öncə almışdım. Həmin pulu alıb, məni buraxdılar. Əvvəl böyük məbləğ dedilər, sonradan ortaq məxrəcə gəldik. Türkiyədə məşqçilər mənə adını açıqlamaq istəmədiyim 2 kluba keçmək variantının olduğunu dedilər. Ancaq “transfer pəncərəsi” bağlandığından, gec idi. Uyğun dedim ki, bilsəydim, məni oynatmayacaqsan, vaxtında alternativləri axtarardım. İndi belə çıxır ki, orada möhkəmlənə bilməyərək, vətənə döndüm. Uyğunla şəxsi problemim olmayıb, güclü mütəxəssisdir. Onu indiyə kimi işlədiyim məşqçilərdən ən yaxşılardan sayıram. Uyğun gələcəkdə Azərbaycanda məşqçilik etmək istəyir. Hansısa klubumuz çalışdırsa, buna sevinərəm”.

Millimizin kapitanı 29 yaşı olmasına baxmayaraq, yenidən legioner həyatı yaşmaq haqda düşünür. Ancaq Rəşad Türkiyə Superliqasına qayıtmaqda maraqlı deyil: “Buna görə də “Qarabağ”la uzun müddət müqavilə bağlamaq istəmədim. Yayda yenidən xaricə gedib, özümü sübut etmək istərdim. İndi “Əskişəhərpsor” və “Alaniya” arasında seçim etməli olsaydım, ikincisinə üstünlük verərəm”.

 

OXŞAR XƏBƏRLƏR