Dövlət dilinin qaydalarına riayət etməyənlərə qarşı tətbiq olunan cərimələr artırıla bilər. Buna səbəb ölkədə reklam çarxlarında və posterlərində dövlət dili qaydalarının kobud şəkildə pozulması hallarının artmasıdır. Artıq parlamentdə, dilimizin qorunması üçün xüsusi qurumun yaradılmasına da ehtiyac duyulduğu haqda fikirlər səslənir.Ölkənin kütləvi informasiya vasitələrində, paytaxt küçə və meydanlarında, restoranlarda yayımlanan reklam çarxları, adlarda Azərbaycan dilinin qaydalarının kobud şəkildə pozulması halları xeyli artıb.Milli Məclisin Hüquq siyasəti və dövlət quruculuğu komitəsinin üzvü, millət vəkili Azay Quliyevin sözlərinə görə, respublikada bir çox müəssisə və təşkilatlarda, reklam çarxlarında dövlət dili haqqında qanuna riayət olunmur. Millət vəkilinin fikrincə, dövlət dili haqqında qanunun tələblərinin qorunması üçün ilk növbədə monitorinq aparılmalı, vəziyyət araşdırılmalı, müvafiq qurumlara məlumat verilməli və bu qaydaları pozan müəssisələrə, təşkilatlara, o cümlədən, şəxslərə qarşı inzibati tədbirlər görülməlidir.Millət vəkili Azay Quliyev bildirib ki, bu tədbirlər sırasına xəbərdarlıq, inzibati cərimə daxil ola bilər: “İnzibati cərimə məsələsinə, onun sərtləşdirilməsinə yenidən baxıla bilər”.Millət vəkili bir çox hallarda reklam çarxlarında istifadə olunan ifadələrin Azərbaycan ədəbi dilinə uyğun olmadığını qeyd edib. Onun fikrincə, bu məsələ təkcə qanunvericiliklə həll olunmamalıdır, həmçinin QHT-lər, KİV-lər Azərbaycan dilinin təhrif olunmasını ictimai qınaq obyektinə çevirməlidir. O, bu cür halların qarşısının alınması üçün inzibati tədbirlər və cərimə sanksiyaları ilə yanaşı xüsusi qurumun yaradılmasına da ehtiyac olduğunu bildirib.
