Millət vəkili Jalə Əliyevanın ideya müəllifi olduğu, Milli Qəhrəman Mübariz İbrahimovun əziz xatirəsinə həsr olunan Vətənpərvərlik mövzusunda gənclərin 1-ci Ümumrespublika Teatr Festivalı davam edir. AZXEBER.COM portalı festivala qoşulan “Sfera” teatrının rejissoru Alik Şıxzadayevin müsahibəsini olduğu kimi təqdim edir.

-Özünü oxuculara təqdim et...

Adım Alik, soyadım isə Şixızadayevdir. Özüm Bakı Slavyan Universitetinin filologiya fakültəsinin 4-cü kurs tələbəsiyəm.

-Necə oldu ki, bu festivala qoşulmaq qərarına gəldin?

“Sfera” teatrı olaraq bu günə qədər bir çox bölgələrdə qastrollarda olmuşuq. Biz bu cür festivallarda əvvəlcədən də iştirak etdiyimiz üçün 1-ci ümumrespublika gənclər festivalına qoşulmaq qərarına gəldik. İnternetdən bu haqda məlumat əldə etdim və teatrımızın rəhbəri Fikriyyə xanıma bu barədə məlumat verdim. Beləcə biz bu festivala qoşulmaq qərarına gəldik.

-Bu günə qədər Sfera teatrı hər hansı bir qalibiyyət əldə edibmi?

Bəli, bu günə qədər biz bir neçə dəfə mükafat almışıq. Bildiyiniz kimi, “Sfera” teatrı Slavyan Universitetinin tərkibində fəaliyyət göstərir. Və buna görə də biz bir neçə dəfə universitetdə səhnələr qoymuşuq. Rektor isə buna görə bizi mükafatlandırıb.

-İstərdim, bir az ssenari ilə bağlı məlumat verəsən. “Zirzəmi” pyesini səhnələşdirərkən necə çətinliklərlə qarşılaşdın?

Sseanarini əldə etdikdən sonra biz bütün aktyorlarla bir yerdə yığışdıq və obrazlarını bölüşdürməyə başladıq. Daha sonra isə, mən bir neçə obrazda dəyişiklik etmək məcburiyyəti qarşısında qaldım.

-Bu dəyişikliyin səbəbi nə idi?

Sadəcə, obrazların çox olması. Pyesdə bir çox obraz var idi ki, mən onu ixtisar etmək məcburiyyətində idim. İnşallah, digər dəyişiklikləri səhnədə hər kəs görəcək və ümidvaram ki , bu dəyişikliklər bizim xeyrimizə olacaq.

-Festivalda iştirak etməklə ən böyük iddianız nədir?

Təbii ki, birincilik. Biz bunun üçün bu festivala qoşulmuşuq. Bizim ən əsas məqsədimiz məhz buradan birinci qran-pri ilə ayrılmaqdır.

-Bəs özün necə müşahidə edirsən, ümumilikdə götürəndə, ətrafında yaradıcı gənclər varmı?

Əlbəttə ki, var. Biz Slavyan Universitetində hər hansı bir tamaşanı səhnələşdirərkən, mənim qrup yoldaşlarım və bir çox gənc bizə baxmaq üçün sıra gözləyir. Hətta onlardan bəziləri bizim məşqlərə gəldikdən sonra bizim teatra üzv olmaq istəyir. 

-Uğurlar sizə

Təşəkkürlər edirəm

Əfsələddin AĞALAROV