Niderlanda səfəri zamanı Səbinə Babayeva 21 aprel tarixində “Eurovision Konsertdə” adlı tədbirdə səhnədə çıxış edərək, Amsterdamda böyük rezonans yaratdı.
AZXEBER.COM-unməlumatına görə, hər şey qayıq gəzintisi ilə başladı və Azərbaycanın Eurovision təmsilçisi Avstriya, Niderland, Belçika, Malta, Fransa, Latviya, San Marino, Macarıstan, Sloveniya, Bolqarıstan, Türkiyə, Portuqaliya, Moldova və bir çox digər ölkələrdən olan həmkarları ilə görüşdü.
Əlbəttə ki, Səbinə bütün Eurovision iştirakçılarını may ayında doğma Bakı şəhərinə dəvət etmək fürsətini əldə qaçırmadı və onları əmin etdi ki, təmsilçiləri Azərbaycan qonaqpərvərliyin ən yaxşı adət-ənənəsi ilə səmimiyyətlə qarşılayacaqlar.
Səbinə Fransa və Hollandiya təmsilçiləri Anqqun və Xaon Franka ilə dostlaşdı. Anqqun Səbinəni hətta ən mühüm rəqib adlandırdı.
Səbinə həmçinin tədbirdə olan bir çox Avropa jurnalistləri ilə apardığı söhbətlərdən məmnun qaldı. Xüsusən də, onların sırasında Almaniya, Fransa, Niderland, Malta, Rumıniya və Moldova kimi ölkələrin çap və elektron media mənsubları, eləcə də NDR Almaniya, SBS 6, France 3, RTL telekanalları var idi.
Lakin ən maraqlısı sonra baş verdi. Səbinə “Eurovision Konsertdə” tədbirin auditoriyası qarşısında özünün müsabiqə üçün hazırlanmış “When the Music Dies” mahnını eksklüziv olaraq iki dildə - ingilis və doğma azərbaycan dillərində ifa edərək, dinləyənlərin qəlbini qazandı.
Səbinə qeyd etdi: “Bu, mənim üçün həqiqətən unudulmaz və böyük bir gündür. Burada olmağıma və nəhayət, hamı ilə görüşməyimə çox şadam! Çox sevindim və dinləyicilər məni həvəsləndirərək, böyük enerji verdi! Amsterdam çox təsiredicidir! Səbirsizliklə hamını Bakıda görməyi arzulayıram!”
