"İranə xanımın ürəyi dayandı. Onun istedadı kimi, xəstəliyi də qeyri-adi oldu. Motoneyron, neyronların ölməsi xəstəliyi var idi. Çox nadir xəstəlikdir. Birinci ayaqları tutuldu. O qədər iradəli insan idi ki, son gününə qədər reabilitoloqla idman edirdi. O dərəcədə ruh var idi onda".
AZXEBER.COM xəbər verir ki, bu sözləri Əməkdar artist Firdovsi Atakişiyev "Həftənin qonağı" verilişində mərhum həyat yoldaşı, Xalq artisti İranə Tağızadənin xəstəliyindən danışarkən deyib. Aktyor mərhum xanımının xəstəliyinin sağalmaz olduğunu vurğulayıb:
"3 il hər şeyi atdım, sənətdən uzaqlaşdım, ancaq İranə ilə oldum. Heç vecimə də deyildi. Çəkilişlərdən imtina etdim. İki köməkçimiz var idi. Mən isə üçüncü. Oğlum da eynən. İşdən qayıdan kimi mənim bir neçə saat dincəlməyimə imkan verirdi. Çox çətin günlər idi. Buna baxmayaraq, deyib-gülür, planlar qururduq. Çox çalışdıq, Moskvada, Türkiyədə olduq. İsraildəki həkimlərlə də əlaqə saxladıq. Amma heç cür olmadı. Sağalması mümkün deyildi. 3 il mərhələli şəkildə xəstəliyi artdı. Son 6 ayı çox əziyyət çəkdi, qucağımızda gəzdirirdik. Buna görə məndə və oğlumda bel yırtığı yarandı. Bir dəfə 48 saat davam edən ağrıdan qışqırırdım. İndi də ildə iki dəfə bundan müalicə alıram.
Əlbəttə ki, halal xoşu olsun. Həmişə deyirdi ki, mənə görə hər şeydən imtina edirsən. Cavab verirdim ki, bəs sən mənə bu qədər sevgini, səadəti yaşadanda necə?"
Firdovsi Atakişiyev mərhum həyat yoldaşının xəstəliyi dövründə sənətdən uzaqlaşdığını və bütün təklifləri rədd etdiyini açıqlayıb:
"Türkiyədən serialla bağlı təklif gəlmişdi. Dedim ki, heç cür mümkün deyil. Söylədilər ki, bilirsən nədən imtina edirsən? Bildirdim ki, bilirəm. Oğlum hətta təklif etdi ki, işdən çıxsın. Bu müddət ərzində mən çəkilim. Dedim ki, hə, bir bu qalmışdı. Təsəvvür et, Türkiyədə seriala çəkilirəm. Çəkilişdən sonra gəlib hoteldə dincəlirəm. Sən isə burada belə. Dedim ki, ola bilməz, mümkün deyil.
Mənə deyirdilər ki, özünü kölgəyə döndərmisən, nə gündəsən? Həm də həddindən artıq arıqlamışdım. Özümə fikir vermirdim. Təklif etdilər ki, səni filmə çəkək, maddi yardım olsun. Ona da cavab verdim ki, mənə heç nə lazım deyil, hər şey qaydasındadır, təki sevgimi geri qaytara bilim. O da alınmırdı. Amma İranə dünyasını dəyişəndən 1 həftə sonra artıq işləməyə başladım."
Qeyd edək ki, İranə Tağızadə Əməkdar incəsənət xadimi, Azərbaycan Dövlət Akademik Rus Dram Teatrının rejissoru olub. İ.Tağızadə 9 aprel 2023-cü ildə uzun sürən xəstəlikdən sonra vəfat edib.
