AZXEBER.COM Xezerxeber.az-a istinadən xəbər verir ki, görüntülər Sumqayıt şəhər Bağça Şəhər yaşayış kpmpleksindəndir.
İçməli suyun verilməsində yaranan problem sakinlərin narazılığına səbəb olub. Onların sözlərinə görə, üç gün ərzində mənzillərə su verilmədiyindən onlar əvvəlcədən xüsusi qablara su toplayaraq gündəlik tələbatlarını ödəməyə məcbur qalıblar. Bildirilir ki, ehtiyat su anbarına su vurulmadığı üçün binalara suyun verilməsi dayanıb.
Yaşayış kompleksinin komendantı İlham Əhmədov bildirib ki, hazırda kompleksdə 6 məhəllə üzrə 30 bina mövcuddur. Burada 2550 ailə, yəni təxminən 11 min nəfər yaşayır. Komendant qeyd edib ki, gələcəkdə digər binalara da sakinlərin köçürülməsi ilə su təminatı məsələsi daha ciddi problemə çevrilə bilər. Sakinlər hazırda içməli suya həsrət qalıblar.
Məsələ ilə bağlı Sumqayıt Su Kanal İdarəsindən "Xəzər Xəbər”ə bildirilib ki, ərazidə baş vermiş qəza artıq aradan qaldırılıb. Qurumdan verilən məlumata görə, gün ərzində həmin yaşayış binalara içməli suyun fasiləsiz verilməsi tam təmin olunub.
