İran Xarici İşlər Nazirliyi (XİN) bazar günü ABŞ-nin ölkənin cənub sahillərinə endirdiyi zərbələri qətiyyətlə pisləyən bəyanat yayıb.
AZXEBER.COM Oxu.Az-a istinadən xəbər verir ki, İran XİN-in bəyanatında Vaşinqtonun "qəddar hücumları"nın Tehran və Vaşinqton arasında əldə olunmuş qarşılıqlı anlaşma memorandumunda təsbit edilən atəşkəs rejimini pozduğu vurğulanıb.
Bəyanatda həmçinin qeyd olunub ki, bu hücumlar ABŞ rejiminin öz öhdəliklərinə zərrə qədər də əhəmiyyət vermədiyini göstərir və vədlərin pozulması bu rejimin mahiyyətinin bir hissəsidir.
"İran ABŞ-nin hərbi təcavüzünə qarşı öz milli suverenliyini və ərazi bütövlüyünü qorumaq əzmində olduğunu vurğulayır", - deyə İslam Respublikasının Xarici İşlər Nazirliyi bildirib.
Xatırladaq ki, daha əvvəl ABŞ Silahlı Qüvvələri İran ərazisinə zərbələr endirib. Bu barədə ABŞ ordusunun Mərkəzi Komandanlığı (CENTCOM) məlumat yayıb.
Bildirilib ki, əməliyyat İranın Hörmüz boğazında "kommersiya gəmiçiliyinə qarşı davam edən təcavüzünə" cavab olaraq həyata keçirilib.
ABŞ hərbi aviasiyası İranın hərbi müşahidə infrastrukturu obyektlərini, rabitə sistemlərini, hava hücumundan müdafiə mövqelərini, pilotsuz uçuş aparatlarının saxlanıldığı məntəqələri və dəniz minalarının yerləşdirilməsi üçün istifadə olunan vasitələri hədəfə alıb.
