Seymur Verdizadə
Jurnalistlər mərhum Qabil Əbilovu yaxşı tanıyırdılar. Bir müddət Qaçqınların və Məcburi Köçkünlərin İşləri üzrə Dovlət Komitəsinin mətbuat xidmətinin rəhbəri vəzifəsində çalışan Qabil müəllim qısa vaxt ərzində jurnalistlərlə dostlaşmışdı. İşinə son dərəcə məsuliyyətlə yanaşan Qabil Əbilov həm də maraqlı həmsöhbət olduğu üçün media əhli onun xətrini çox istəyirdi.Biz Qabil müəllimlə tez-tez görüşüb, ən müxtəlif mövzularda fikir mübadiləsi aparırdıq. Mən, Qabil müəllimin həyatı haqqında məqalə yazmaq istəyirdim. Amma amansız ölümün onu bu qədər erkən yaxalayacağını ağlıma gətirmədiyim üçün günü-günə satırdım. İndi Qabil müəllimdən bizə ancaq kövrək xatirələr qalıb.Qabil Əbilov ixtisasca şərqşünas idi. O, indiki Bakı Dövlət Universitetinin şərqşünaslıq fakültəsini bitirmişdi. Ərəb və fars dillərini yüksək səviyyədə bilən Qabil müəllim bir neçə il Əfqanıstanda tərcüməçi işləmişdi. Qabil müəllimin Əfqanıstanda işlədiyi illər SSRİ-nin bu ölkəyə ordu yeritdiyi dövrə təsadüf etdiyi üçün o, ölümün soyuq nəfəsini dəfələrlə kürəyində hiss edib. Amma hər dəfə bir möcüzə nəticəsində xilas ola bilib. Axı, həyat möcüzələrlə doludur......Moskvadan gələn iki yüksək rütbəli zabitlə sovet hərbi birləşmələrinin Kabul yaxınlığındakı sıra dağların ətəyində yerləşən N saylı hərbi hissəsinə gedən Qabil Əbilov yolda mühasirəyə düşür. Əfqan mücahidlərin öndəki mühafizə taqımını zərərsizləşdirməsi cəmi beş dəqiqə çəkir. Müqavimət göstərməyin mənasız olduğunu başa düşən rus zabitləri əllərindəki tapançaları maşının pəncərəsindən yerə ataraq, aşağı düşürlər. Qabil müəllim də analoji qaydada davranaraq, könüllü şəkildə təslim olur. Gənc tərcüməçini də sovet zabitləri ilə birlikdə mücahidlərin yaxınlıqdakı düşərgəsinə aparırlar. Zabitlərin “məhkəməsi” cəmi iki dəqiqə çəkir. Mücahidlər hər iki zabiti sorğu-sualsız qətlə yetirirlər. Sonra mücahidlərin başçısı gözləri yaşamaq eşqi ilə alışıb-yanan qıvrımsaç tərcüməçiyə yaxınlaşır. O, əlindəki silahı gənc tərcüməçinin alnına dirəyəndə, Qabil müəllim ölümün qaşla göz arasında olduğunu başa düşür. Cəbrayılda mömin ailədə böyüyən Qabil Əbilov bir müsəlman kimi sonuncu borcundan çıxmaq üçün titrək səslə kəlmeyi-şəhadətini söyləməyə başlayır. Qarşısındakı adamın kəlmeyi-şəhadətini söylədiyini görəndə, mücahidlərin başçısının qolları boşalır. O, sovet tərcüməçisinin alnına dirədiyi silahı qeyri-ixtiyari olaraq aşağı endirir. Kəlmeyi-şəhadətini bilməsi Qabil müəllimin həyatını xilas edir. Tərcüməçinin müsəlman olduğunu öyrənən mücahidlər bir qədər məzəmmət etdikdən sonra onu sağ-salamat Kabula yola salırlar.
