AZXEBER.COM xəbər verir ki, məsələ ilə bağlı Demokrat.az-a danışan iqtisadçı Razi Abbasbəyli bildirib ki, hazırda ölkəmizdə elə bir mövsüm dövrü yaşanır ki, ərzaq rasionunda ət və ət məhsullarına tələbat azalır:
"Yaz və yay aylarında həm ətin saxlanma şəraitinin çətinləşməsi, həm də ərzaq səbətində alternativ qidaların artması nəticəsində ətə olan tələbat aşağı düşür. Bu da qiymətlərin ucuzlaşmasına səbəb olur.
O qeyd edib ki, bu azalmanın təsiri isə bir neçə aydan sonra, payız mövsümündə daha aydın hiss olunacaq:
"Problemlər yalnız yonca təsərrüfatları ilə məhdudlaşmır. Maldarlıq üçün yem məqsədilə əkilən digər bitkilərdə də oxşar vəziyyət müşahidə olunur. Buraya qarğıdalı və çuğundur sahələri də daxildir. Müşahidələr göstərir ki, əlverişsiz hava şəraiti həmin məhsulların tədarükünü ciddi şəkildə çətinləşdirib və bəzi hallarda məhsuldarlıq demək olar yarıyadək azalıb.
Bütün bunlar nəticə etibarilə yem tədarükünün maya dəyərini artıracaq. Bu isə payız aylarında maldarlıq təsərrüfatlarında xərclərin yüksəlməsinə, nəticədə mal və qoyun ətinin qiymətinin bahalaşmasına səbəb olacaq. Hazırkı qiymət artımı keçici xarakter daşıyır və böyük ehtimalla yay aylarında, təxminən sentyabra qədər ətin qiymətində ciddi bahalaşma müşahidə olunmayacaq. Lakin payız aylarından etibarən bazarda ətin qiymətinin nəzərəçarpacaq dərəcədə artacağı gözlənilir”.
