Köhnə Moskva mehmanxanasının yerində tikilən “Alov Qüllələri” elə tikilməyə başladığı andan diqqət çəkirdi. Hər kəsi burada inşa olunan nəhəng tikilinin son vəziyyəti maraqlandırırdı. Amma Bakının sahib olduğu bu fantastik tikili istifadəyə verilməmiş problemlərlə qarşılaşıb. Belə ki, bug gün axşam saatlarında göydələnlərin tikildiyi ərazidə torpaq sürüşməsi baş verib. Nəticədə sözügedən ərazidə dərin çatlar meydana gəlib. Tikintidə çalışan fəhlələrin musavat.com-a verdiyi məlumata görə axsam saatlarında baş verən sürüşmə nəticəsində qüllələrin tikintisində fasilə yaranıb: “Axşam saatlarında qüllənin inşa olunduğu sahədə kiçik torpaq sürüşməsi oldu. Bayıldakı məlum sürüşmədən sonra belə bir hadisəni gözləyirdik. Əraziyə tikinti mütəxəssisləri və Fövqəladə Hallar Nazirliyinin məsul işçiləri gələndən sonra tikintidə işlər bərpa olunub”. Məsələ ilə bağlı Fövqəladə Hallar Nazirliyinin mətbuat xidməti ilə əlaqə saxlamaq istədik. Lakin nazirliyin mətbuat xidməti çoxsaylı zənglərimizə cavab vermədi.
Ərazidə olarkən öyrəndik ki, son günlər burada tikinti işləri sürətlənib. Çünki 2008-ci ildə tikintisinə başlanılan “Baku Flame Towers”, yəni Bakı “Alov Qüllələri” binasının gələn ilin martına istifadəyə veriləcəyi gözlənilir. Binanın xaricində işlər 90 faiz tamamlanıb. Binanın vaxtlında təhvil verilməsi üçün qüllənin daxilində də təmir-tikinti işləri aparılır. Üç binadan ibarət olan alov qüllələri paytaxtın həm də vizit kartı olacaq. Tikintidə çalışan mühəndislərdən biri musavat.com-a bildirdi ki, bu tikili ayrı-ayrı funksiyaları yerinə yetirəcək: “Binalardan biri 328 yerlik mehmanxanadır. Həmin qüllənin özülü digərlərinə nisbətən dərin qazılıb. Çünki əvvəllər torpağın ilk üç qatında dərin çatlar əmələ gəlib. Tektonik hadisələrə həssas sahədir. Digər qüllə biznes mərkəzi, o biri isə 140 mənzilli rezidensiya - yaşayış binası kimi fəaliyyət göstərəcək. Bu gün sadəcə kompleksdə hər üç binanı birləşdirəcək ticarət mərkəzinin, eləcə də kinoteatların inşası aparılır. Gələn həftə artıq binanın işıqlandırma sistemi quraşdırılacaq. “Eurovision”a kimi bina hazır olmalıdır”. Qeyd edək ki, dəyəri 350 milyon dollar olan layihəyə sifarişçisi “Azinko Development MMC” şirkətidir. Binalar “Hill İnternational” şirkəti tərəfindən tikilir.
***
Binanın tikintisini həyata keçirən “DİA Holdinq” şirkətinin nümayəndəsi Akif Musayev isə “Qafqazinfo”ya bildirib ki, sürüşmənin olması ilə bağlı deyilənlər həqiqətə uyğun deyil. O bildirib ki, bina çox etibarlı tikilib: “Həmin üç qüllənin hər birinin 40 metrə qədər özülü var. O heç bir halda sürüşə bilməz. Azərbaycanda tikilən binalar içərisində “Üç Alov” ən etibarlı binadır. Gərək bütün Bakı sürüşsün ki, “Üç Alov” da sürüşsün. Ona görə də bu məlumatlar yanlışdır”.
