Yenidənqurma müddətində '28 May' stansiyası bağlanmayacaq

Bakı metrosunun “28 May” stansiyasının yenidənqurulmasına başlanılıb. Stansiyada yenidənqurma zamanı işlər əsasən, gecələr - metropolitendən sərnişinlər istifadə etmədiyi vaxtlarda aparılacaq.Bakı Metropolitenindən bildirilib ki, buna görə də, yenidənqurma işləri zamanı stansiyanın müvəqqəti bağlanması və fəaliyyətinin dayandırılması nəzərdə tutulmayıb.“Ümumiyyətlə, metropoliten rəhbərliyi bu ilin avqustunda layihəsi təsdiq olunmuş “28 May” stansiyasının yenidənqurulmasını həyata keçirmək üçün tədbirlər planını işləyib hazırlayarkən, məhzsərnişinlərin təhlükəsizliyinə xələl gətirilməməsini və stansiyanın xidmətindən istifadə edərkən sərnişinlərin maneələrlə üzləşməməsini qarşıya məqsəd qoymuşdu.Həmişə olduğu kimi, görülən işlər, ələlxüsus da sərnişinlərin maraqları ilə toqquşan tədbirlər barədə metropoliten rəhbərliyi daim sərnişinləri əvvəlcədən məlumatlandırıb, lazım olduqda, bu barədə ətraflı məlumatlar da təqdim edib. Bundan sonra da həm “28 May” stansiyasının rekonstruksiyası, həm də digər işlər barədə ictimaiyyətə, o cümlədən kütləvi informasiya vasitələrinə operativ məlumatlar təqdim olunacaq”, - Metropolitendən bildirilib.Qeyd edək ki, rekonstruksiya Azərbaycan Prezidenti İlham Əliyevin 2011-ci il martın 18-də “Bakı Metropoliteninin 2011-2015-ci illərdə inkişafına dair Dövlət Proqramı” və “Bakı Metropoliteninin perspektiv inkişafı ilə bağlı əlavə tədbirlər haqqında” sərəncamlarına uyğun olaraq aparılır.