Tural Abbaslı: “Sapı özümüzdən olan baltalar biz deyilik, maddi maraqlar qarşılığında hakimiyyətə yarınan gənclərdir”
Rauf Mərdiyev: “Insanları təhqir etməyi özünə həyat tərzi seçmiş müxalif gənclərə bu ən layiqli cavabdır”
İqtidarı və müxalifəti dəstəkləyən gənclərin sözdavası bu dəfə özünü repdə göstərib. Mətbuatda itidara qarşı dərc olunan repdən sonra Zevs ləqəbli repçi müxalifətdə olan gənclərə repiylə sərt cavab verib.
Repçi müxalifətdə olan bir sıra gəncləri sapı özümüzdən olan baltalar, xaricdən gələn qrantlara işləyən adlandıraraq, onları fərarilikdə ittiham edib.
Müsavat Partiyasının Divan üzvü Tural Abbaslı replə yaltaqlığın bir araya sığmadığını deyərək, Zevsə rep banisi Tupakdan nümunə götürməyi təklif etdi:“Rep küçədə yaranan və haqsızlığa qarşı yönələn bir musiqi janrıdır. Görünür Zevs ləqəbli reper hakimiyyətə yarınmaqla, onların diqqətini çəkməyə çalışır. Ən yaxşı halda onu yaşadığı rayonun icra başçısı çağırıb, bir-iki manat pul verə bilər. Biz ondan fərqli olaraq bir-iki manat pula satılmırıq. Sapı özümüzdən olan baltalar biz deyilik, maddi maraqlar qarşılığında hakimiyyətə yarınan gənclərdir. Düşünürəm ki, Zevsin əməli riyakarlıqdır və belə mənasız adamlara və onların “vətənpərvər”liyinə rəy vermək sadəcə vaxt itkisidir”.
“İrəli” İctimai Birliyinin sədri Rauf Mərdiyev əvvəlcə bu repi ifa edən gəncin rəhbərlik etdiyi təşkilatın üzvü olmasına dair suala aydınlıq gətirdi:“Mətbuatda Zevs ləqəbli reperin “İrəli” İctimai Birliyinin üzvü olmasına dair informasiya yayıldı. Biz bu yazılanlardan sonra araşdırma apardıq və bu rep müəllifinin həqiqətən “İrəli”çi olması və ya bizim birliyə simpatiyası olduğu faktını üzə çıxardıq. Bu gün “İrəli” İctimai Birliyinin 30 mindən artıq üzvü var. Sıralarımızda cəmiyyətin ən müxtəlif təbəqələrini təmsil edən gənclər birləşib. Onların arasında müxalifətçilərə qarşı qəzəbini gizlədə bilməyən gənc reperlərin olması təbiidir. Düşünürük ki, insanları təhqir etməyi özünə həyat tərzi seçmiş müxalif gənclərə bu ən layiqli cavabdır. Onlar illər uzunu bu iqtidarı, onu dəstəkləyən gəncləri təhqir edəndə olar, iqtidaryönlü reper onlara qarşı rep ifa edəndə yox?!”.
