Qarabağ Azadlıq Təşkilatının AZXEBER.COM-a verdiyi məlumata görə, bu gün 2 Milli Qəhrəmanımızın doğum günüdür...
22 mart Azərbaycanın Milli Qəhrəmanı Əsəd Əsədovun doğum günüdür. Əsəd Soltan oğlu Əsədov 1956-cı il martın 22-də Zəngilan rayonunun Turabad kəndində anadan olmuşdur. Hərbi təyyarəçi kimi Qarabağ səmasında rəşadətlə vuruşmuş, düşmənə ağır zərbələr vurmuşdur. 1991-ci il oktyabrın 29-da Dağlıq Qarabağın Xanabad kəndi üzərində komandiri olduğu ekipaj düşmənlə son döyüşə girmiş və qəhrəmanlıqla həlak olmuşdur. Zəngilan rayonunda dəfn edilmişdir. Zəngilan rayonu Turabad kənd orta məktəbi və Mincivan qəsəbəsindəki küçələrdən biri onun adını daşıyır.
22 mart Azərbaycanın Milli Qəhrəmanı İxtiyar Qasımovun doğum günüdür. İxtiyar Qasım oğlu Qasımov 1970-ci il martın 22-də Ağdam rayonunun Salahlı kəndində anadan olmuşdur. 1992-ci ilin yanvarında könüllü olaraq cəbhəyə getmiş, döyüşə kəşfiyyatçı kimi başlamışdır. Onun rəhbərliyi altında Dağlıq Qarabağın Qazançı kəndində düşmənin 3 PDM-i, 1 PZM-i və onlarla canlı qüvvəsi məhv edilir. 1992-ci il mayın 15-də Ağdamın Abdal-Gülablı kəndinin müdafiəsində xüsusi fərqlənir. 1992-ci il iyulun 14-də Dağlıq Qarabağın Canyataq kəndinin müdafiəsi zamanı axıra qədər vuruşur, təkbaşına düşmənin qarşısını saxlayır və qəhrəmanlıqla həlak olur. O, bu hərəkəti ilə onlarla yaralı əsgərimizin həyatını xilas edir. Salahlı kənd qəbirstanlığında dəfn edilmişdir. Salahlı kənd orta məktəbi onun adını daşıyır.
