Ərinin işgəncələrindən qaçan üç uşaq anası olan 26 yaşlı Əfsanənin yaşadıqları ölkə ictimaiyyətində rezenans doğurub. Əfsanənin həyat yoldaşı Səxavət fermada çobanlıq edir. Ailə elə həmin fermada yaşayır. 10 ildir ailəli olan gənc qadın son dəfə qırmancla döyüldükdən sonra üç azyaşlı uşağını da götürüb evdən qaçıb. Bakıya üz tutaraq Xoşqədəm Hidayətqızını axtarıb tapıb, ondan kömək istəyib. Qadının əri Səxavət elə həmin günü həyat yoldaşının və uşaqlarının itkin düşməsilə bağlı polisə müraciət edib. Polis tərəfindən yeri müəyyən edilən ana və azyaşlılar sığınacağa yerləşdirilib.
AZXEBER.COM BAKU.WS-ə istinadən xəbər verir ki, dünən "Səni axtarıram" proqramında Əfsanənin məsələsi müzakirəyə çıxarılıb.
Canını və uşaqlarını götürüb evdən qaçan qadın bu illər ərzində mütəmadi şəkildə döyüldüyünü, təhqirlərə məruz qaldığını bildirib. Qadının sözlərinə görə, dəfələrlə anasına bu barədə desə də, ana qızına "Qadının ər evindən ancaq meyiti çıxar" deyərək dözməyi məsləhət verib.
Əfsanənin söylədikləri və xarici görünüşü hər kəsi dəhşətə gətirib. Belə ki, 16 yaşından ərə verilən və üç uşaq anası olan Əfsanınin 26 yaşında olduğuna heç kim inanmayıb. Sosial şəbəkələrdə münasibət bildirən izləyicilər ona 40-dan az yaş verməyiblər. Hətta Əfsanənin nəinki 26, 76 yaşlı qadına bənzədiyini deyənlər olub.
Həyat yoldaşı Səxavət dayısını da götürüb barışıq üçün efirə gəlib. Lakin Əfsanə qətiyyətlə barışmaq istəmədiyini deyib:
"10 ildir dözürəm. İnsan nə qədər döyülüb-söyülər? Məni qırmancla döyüb, qarnımın üstünə çıxıb tapdalayıb, bədənimdə siqaret yandırıb, uşaqları döyür. Fikirləşib qərar vermişəm, barışmaram. İşləyib uşaqlarımı saxlayacam. Guya orada işləmirdim? Gecə-gündüz işləyirdim. O da uşaqlarına aliment versin. Barışmaq fikrim yoxdur. Daha bədənimdə döyülməyə salamat yer yoxdur. Hər gün içib döyür. Bir söz deyə bilmirəm, uşaq xəstədir, deyirəm pulu az xərclə, uşağı həkimə aparaq. Bu sözümdən hirslənib döyür. Mənə deyir ki, səni öldürəcəm. Nəsimini soyan kimi dərini soyacam, balta ilə tikə-tikə doğrayıb yandıracam".
Əfsanə 9 yaşlı qızının və 8 yaşlı oğlunun oxumaq-yazmaq bilmədiyini deyib:
"Uşaqlarımı məktəbə buraxmır. Adları məktəbdə gedir, ancaq özləri getmirlər. Nə qızım, nə də oğlum oxumaq-yazmaq bilmirlər. Uşaqlarımı oxutmaq istəyirəm".
Barışmaq üçün efirə gələn Səxavət həyat yoldaşını qırmancla döydüyünü etiraf edib:
"O, böyük səhv edib evdən çıxıb. Hər evdə söz-söhbət olub. Mən ona 2 qırmanc vurmuşam. Çox əsəbiləşdim, ata vurulan qırmancı götürüb vurdum. Səhvimi başa düşürəm. Üç uşağım var, barışmaq istəyirəm".
Xatırladaq ki, 17 yanvarda 1993-cü il təvəllüdlü İsayeva Əfsanə Cəmil qızı, 9 yaşlı qızı Nurcan, 8 yaşlı oğlu Nurlan və 1 yaşlı oğlu Sərxan İsayevin itkin düşməsilə bağlı məlumat yayılmışdı.
