Milli Məclisin deputatı Azər Allahverənov bu gün "Hədəf" verilişində qonaq olarkən Ermənistan tərəfinin sülh prosesində tutduğu mövqeyə münasibət bildirib.
AZXEBER.COM xəbər verir ki, deputat qeyd edib ki, Ermənistanın Xarici İşlər Nazirliyi, parlamenti, Təhlükəsizlik Şurası və digər qurumlarının dilindən səslənən fikirlərdə real narahatlıqdan çox müxtəlif manipulyasiya elementləri hiss olunur. Onun sözlərinə görə, Azərbaycanın böyük sistemlərin inteqral hissəsinə çevrilməsi və bu sistemləri özü formalaşdırması qürurverici haldır.
"Azərbaycanın möhtəşəm qələbəsi qarşısında Ermənistan çox cılız görünür. Böyük sistemin bir hissəsi olmaq üçün böyük düşünmək lazımdır. Təəssüf ki, Ermənistan hələ də bu səviyyəyə gəlib çıxmayıb. Onlar dövlətçilik anlayışından uzaq, dövlət və milli maraqları nəzərə almadan müəyyən qrupların, xarici siyasi mərkəzlərin və dövlətlərin təsiri altında formalaşmış normativ yanaşmalara əsaslanırlar”, – deyə deputat vurğulayıb.
Allahverənov bildirib ki, Ermənistanın tutduğu destruktiv mövqe sülh prosesinin ləngiməsinə səbəb olur: "Azərbaycan daim beynəlxalq miqyasda ciddi platformalar qurur və bu proseslərdə fəal iştirak edir. Ermənistan isə ya bu proseslərdən kənarda qalır, ya da reallıqdan uzaq, utopik istəklərlə sanki gedən qatarın son tamburuna tullanmağa çalışır. Biz buna baxmayaraq, Ermənistanı bu proseslərə cəlb etməyə çalışırıq və deyirik ki, heç olmasa həmin qatarın son tamburuna minin və dünyada gedən sürətli dəyişikliklərə gec də olsa qoşulun”.
Deputat həmçinin bildirib ki, konstruktiv mövqe nümayiş etdirən bütün tərəflər Azərbaycanın yanında yer alır: "Xüsusilə də İqtisadi Əməkdaşlıq Təşkilatının Xankəndidə keçirilən Zirvə görüşündə bu açıq şəkildə göründü. Bəzi dövlət rəhbərlərinə ehtiyatlı davranmaq tövsiyə olunsa da, ölkə başçıları tədbirdə iştirak etdilər. Bu isə onu göstərir ki, Azərbaycan hələ də ‘sabitlik adası’ olaraq qalır”.
Azər Allahverənov qeyd edib ki, Azərbaycan sülh gündəliyini davamlı olaraq inkişaf etdirir və inteqrasiya layihələri vasitəsilə bu gündəliyi zənginləşdirir: "Artıq Xankəndi, Laçın, Şuşa və digər ərazilər nüfuzlu beynəlxalq tədbirlər üçün dialoq platformalarına çevrilməkdədir. Bu, Azərbaycanın uğurudur. Bəziləri bunu başqa donlara salmağa çalışsalar da, reallıq ortadadır”.
Oksana Orucova
