Xəbər verdiyimiz kimi, Azərbaycanda beynəlxalq təcrübə əsasında çevik iş vaxtı rejimi modellərinin yaradılması planlaşdırılır.
Bununla bağlı məsələ Prezident İlham Əliyevin sərəncamı ilə təsdiqlədiyi Məşğulluq Strategiyasının həyata keçirilməsinə dair 2026-2030-cu illər üçün Tədbirlər Planında öz əksini tapıb.
Plana uyğun olaraq sözügedən müddətdə çevik iş rejimi modellərinin tətbiqi ilə bağlı normativ hüquqi akt layihələri hazırlanmalıdır və aidiyyəti üzrə təqdim edilməlidir. Proqramın icrası Əmək və Əhalinin Sosial Müdafiəsi Nazirliyinə tapşırılıb.
Milli Məclisin deputatı Vüqar İskəndərov AZXEBER.COM-a açıqlamasında deyib ki, əmək bazarında çevikliyin artırılması iqtisadiyyatın yeni mərhələsinin tələbidir:
"Əmək bazarında çevikliyin artırılması iqtisadiyyatın yeni mərhələsinin tələbidir. Prezident İlham Əliyevin təsdiq etdiyi Məşğulluq Strategiyasının həyata keçirilməsinə dair 2026–2030-cu illər üçün Tədbirlər Planında beynəlxalq təcrübəyə əsaslanan çevik iş vaxtı rejimi modellərinin hazırlanmasının nəzərdə tutulması əmək bazarının müasir çağırışlara uyğunlaşdırılması istiqamətində mühüm addımdır. Dünyada rəqəmsallaşma, yeni məşğulluq formalarının yaranması və əmək münasibətlərinin dəyişməsi çevik iş modellərini zərurətə çevirib. Hibrid iş, məsafədən əmək fəaliyyəti, fərdiləşdirilmiş iş qrafikləri və nəticəyönümlü idarəetmə artıq inkişaf etmiş ölkələrdə geniş tətbiq olunur. Azərbaycanın da bu istiqamətdə beynəlxalq təcrübədən faydalanması həm işəgötürənlər, həm də işçilər üçün yeni imkanlar yaradacaq”.
Deputat qeyd edib ki, çevik iş rejimi xüsusilə azyaşlı uşağı olan valideynlərin əmək bazarına çıxış imkanlarını genişləndirə bilər:
"Çevik iş rejimi xüsusilə azyaşlı uşağı olan valideynlər, tələbələr, əlilliyi olan şəxslər və regionlarda yaşayan vətəndaşların əmək bazarına çıxış imkanlarını genişləndirə bilər. Bu yanaşma həm məşğulluq səviyyəsinin yüksəlməsinə, həm də iş və şəxsi həyat arasında balansın qorunmasına müsbət təsir göstərəcək. Yeni modellərin tətbiqi zamanı işçilərin sosial və əmək hüquqlarının tam qorunması əsas prinsip olmalıdır. Hazırlanacaq normativ hüquqi baza həm işəgötürənlərin fəaliyyətini asanlaşdırmalı, həm də işçilərin əmək hüquqları, sosial təminatı və təhlükəsizliyi ilə bağlı təminatları tam şəkildə özündə əks etdirməlidir”.
V. İskəndərov bildirib ki, bu islahatlar ölkədə daha rəqabətqabiliyyətli, innovativ və inklüziv əmək bazarının formalaşmasına töhfə verəcək:
"Əmək və Əhalinin Sosial Müdafiəsi Nazirliyinin həyata keçirəcəyi bu islahatlar ölkədə daha rəqabətqabiliyyətli, innovativ və inklüziv əmək bazarının formalaşmasına, eləcə də qeyri-neft sektorunun inkişafına və insan kapitalının səmərəli istifadəsinə mühüm töhfə verəcək”.
Şahanə Ziyad
