Azərbaycanda tütün daha çox kişilər tərəfindən çəkilir. Qadınlar arasında bu göstərici 1 faizdən azdır. ANS PRESS-in məlumatına görə, bu barədə Ümumdünya Səhiyyə Təşkilatının (ÜST) Azərbaycandakı nümayəndəliyinin rəsmisi Sevil Əsədova məlumat verib. “Bu vərdiş əsasən kişilər arasında geniş yayılıb. Qadınlar arasında bu göstərici çox kiçik olduğundan biz təhlil aparan zaman çox vaxt qadınları nəzərə almırıq", deyə S. Əsədova qeyd edib. ÜST rəsmisi bildirib ki, Azərbaycan tütünlə mübarizə üzrə ÜST-nin Çərçivə Konvensiyasınaimza atsa da, onun bütün maddələrinə tam olaraq əməl etmir. Yalnız reklamla bağlı maddələr yerinə yetirilir. Məsələn, hazırda nə mətbuatda, nə televiziyada, nə də ki, küçələrdə həm alkoqollu içkilər, həm də tütünlə bağlı reklama rast gəlinmir. "Lakin bəzi məsələlər var ki, məsələn, ictimai yerlərdə tütünün çəkilməsi. Bununla bağlı biz Milli Məclislə sıx əməkdaşlıq edirik və yaxın gələcəkdə bu məsələni parlamentdə qaldırmağı planlaşdırırıq”, - deyə ÜST rəsmisi bildirib.
