Biz illərdir müsahibə və açıqlamalarımızda bildiririk ki, radikal müxalifət — xüsusilə özünü "Milli Şura” adlandıran qurumda təmsil olunanlar, eləcə də AXCP və Müsavat funksionerləri — ölkəmizdə fəaliyyət göstərən "5-ci kolon”un təsiri altındadır. Bu qrupların maliyyələşməsi, aldıqları tapşırıqlar və yönləndirilmələr məhz həmin şəbəkənin ölkə daxilində yerləşən rəhbərliyi tərəfindən həyata keçirilir.
Bu fikirləri saytımıza açıqlamasında politoloq Ramiz Alıyev bildirmişdi.
"Son günlər Dövlət Təhlükəsizliyi Xidmətinin həyata keçirdiyi genişmiqyaslı əməliyyatlar isə illərdir söylədiyimiz bu fikirləri tam şəkildə təsdiqlədi. DTX-nın yüksək peşəkarlıqla apardığı xüsusi əməliyyat tədbirləri nəticəsində ölkəmizdə sabitliyi pozmağa, dövlətçiliyimizi zəiflətməyə və daxili qarşıdurmalar yaratmağa cəhd edən qüvvələrin fəaliyyəti bir daha ifşa olundu. Bu əməliyyatlar göstərdi ki, milli təhlükəsizliyimizə yönələn hər hansı təxribat cəhdi dərhal müəyyən edilir və qarşısı qətiyyətlə alınır.”
Politoloq qeyd edir ki, Azərbaycanın hüquq-mühafizə orqanları ictimai təhlükəsizliyin təmin olunmasında, sabitliyin qorunmasında və qanunçuluğun möhkəmləndirilməsində müstəsna rol oynayır. Onların gündəlik fəaliyyəti təkcə cinayətkarlığa qarşı mübarizə ilə məhdudlaşmır — həm də mümkün təxribatların qarşısının alınması, ictimai-siyasi sabitliyin qorunması və ölkəmizdə təhlükəsizlik mühitinin təmin edilməsində mühüm əhəmiyyət daşıyır. Hüquq-mühafizə strukturları arasında formalaşmış sıx koordinasiya isə təhlükəsizlik sisteminin çevikliyini və bütövlüyünü daha da gücləndirir. Bir daha bütün cəmiyyət əmin oldu ki, Azərbaycanın hüquq-mühafizə orqanları kimliyindən, mövqeyindən və sosial statusundan asılı olmayaraq heç kimə — heç bir zaman — dövlətçiliyimizə zərər vurmağa imkan verməyəcək. Təhlükəsizlik qurumlarımız — həm DTX, həm də polis — bu gün həm ictimai asayişin qorunmasında, həm də milli təhlükəsizliyin təmin edilməsində fədakar xidmətləri ilə seçilir və öz fəaliyyətləri ilə xalqımıza, dövlətimizə sarsılmaz bağlılıq nümayiş etdirirlər.
R. Alıyev bildirir ki, Azərbaycan dövlətinin təhlükəsizliyi etibarlı əllərdədir. Bütün hüquq-mühafizə orqanlarımız ölkə başçısı, Ali Baş Komandan cənab İlham Əliyevin rəhbərliyi altında qarşıya qoyulan tapşırıqları yüksək peşəkarlıq, qətiyyət və sədaqətlə icra edir. Xarici dairələrin təsiri altına düşmüş destruktiv qrupların fəaliyyəti isə heç vaxt dövlətin gücündən və xalqın birliyindən üstün ola bilməz. Bu gün Azərbaycan həm daxilən sabit, həm də xarici təhdidlərə qarşı dayanıqlı bir dövlətdir. Dövlətçiliyimizin qorunması, milli maraqlarımızın müdafiəsi və ölkənin təhlükəsizliyinin təmin edilməsi istiqamətində həyata keçirilən bütün tədbirlər ardıcıl və yüksək effektivliklə davam etdirilir.
Azərbaycanın təhlükəsizliyi əmin əllərdədir — və bu əminlik xalq–dövlət birliyinin ən mühüm dayağıdır.
