Azərbaycanlı jurnalistlər Mətbuat Şurası İdarə Heyətinin üzvü Hacıbəy Heydərli, Azxeber.com saytının baş direktoru Əfsələddin Ağalarov və Editor.az saytının baş redaktoru Fərid Şahbazlı Özbəkistanda səfərdə olublar.
Onlar səfər zamanı Özbəkistan Jurnalistlər İttifaqının sədri Xolmurad Salimovla, Özbəkistan Respublikası Həmkarlar İttifaqları Konfederasiyasının "İshanc" və "İshanc-Doveriya" qəzetləri və nüfuzlu media qurumları "Daryo.uz", "Darakci.uz", Renessans TV, Biz TV, MY5 TV, "Platin.uz", "Sevimli TV" media qruplarının rəhbərləri ilə görüşlər keçiriblər.
Görüşlərdə dost, qardaş ölkələr arasında media sahəsində əlaqələrin daha da genişləndirilməsinin vacibliyi vurğulanıb.
Jurnalistlər, eyni zamanda, Özbəkistanın Jurnalistika və Kommunikasiya Dövlət Universitetində tələbə jurnalistlərlə təlimi də baş tutub. Burada gənclərə Azərbaycanda milli mətbuatın tarixi, mediamızın hazırkı durumu və ölkəmizin informasiya mübarizəsi haqqında geniş məlumat verilib.
Görüşlər zamanı dost və qardaş ölkə Özbəkistanın 3 media qurumu ilə memorandum imzalanıb.
