"Bank Respublika” ASC və Niderland İnkişaf Bankı (FMO) növbəti iriməbləğli kredit müqaviləsi imzalayıblar.
İki qurum arasında əməkdaşlıq 2006-cı ildən davam edir. Bu müddət ərzində onlar əməkdaşlığı inkişaf etdirərək bir sıra mühüm anlaşmalara imza atıblar.
Bu dəfə "Bank Respublika" və FMO arasında son illərin ən iri məbləğli kredit müqaviləsi imzalanıb. Müqaviləyə əsasən, Banka 20 milyon ABŞ dolları kredit ayrılacaq. Milli valyutada təqdim ediləcək vəsait aqrar sahədə kiçik və orta sahibkarlığın (KOS), o cümlədən gənclərin və qadınların sahibkarlıq fəaliyyətinin maliyyələşdirilməsində istifadə olunacaq. Hal-hazırda regional xidmət şəbəkəsini genişləndirən "Bank Respublika" bu krediti regionlarda çalışan və xüsusən də kənd yerlərində fəaliyyət göstərən sahibkarlar üçün böyük məbləğdə kreditlərin əlçatanlığın artırılmasına yönəldəcək.
"Qürurverici haldır ki, Avropanın ən böyük maliyyə qurumlarından biri olan FMO artıq 16 ildən çoxdur ki bankımızın stabil və etibarlı maliyyə partnyorlarından biridir. İnanıram ki, həm bu müddət ərzində cəlb etdiyimiz vəsaitlər, həm də bugünkü - 20 milyon dollar dəyərində olan anlaşmamız, nəinki bankın biznes portfelinin inkişafına, həmçinin ölkənin ümumi real sektoruna böyük dəstək olacaq və ölkədə yeni iş yerlərinin yaradılmasında imkanlar yaradacaq.”, - deyə "Bank Respublika”nın İdarə Heyətinin sədri Tariyel İsmaylov qeyd edib.
"İriməbləğli kredit razılaşması imzalamaqla çoxdankı tərəfdaşımız "Bank Respublika”ya bir daha dəstək verməkdən məmnunuq. Müqavilədəki məbləğ tam olaraq gənclərin və qadınların yaratdığı mikro, kiçik və orta müəssisələrin, eləcə də kənd təsərrüfatı KOM-lərının maliyyələşdirilməsinə yönəldiləcək ki, bu da bizim strateji hədəfimiz olan "Bərabərsizliyin azaldılması"na 100% uyğundur. Eyni zamanda, bu razılaşma 5-ci Dayanıqlı İnkişaf Məqsədi - gender bərabərliyi və 8-ci Dayanıqlı İnkişaf Məqsədi - Azərbaycan üzrə iş yerlərinin yaradılması və saxlanmasına uyğundur ki, bu da öz növbəsində kreditin əhəmiyyətini göstərir. "Bank Respublika" ilə əməkdaşlığımızın bundan sonra da davam etdirilməsinə ümid edirik”, - deyə FMO-nun İnvestisiya Direktoru Huib-Jan de Ruyter bildirib.
