İspaniyanın “Barselona” klubu Portuqaliyanın “Portu” komandasına qalib gələrək, UEFA Superkubokunu qazanıb . Qarşılaşma Monakoda keçirilib. Oyunda ilk qol 39-cu dəqiqədə vurulub. Bir gün əvvəl 2010/2011-illər mövsümündə Avropanın ən yaxşı oyunçusu seçilən Lionel Messi “Portu”nun oyunçularının səhvindən yararlanaraq hesabı açıb. 88-ci dəqiqədə isə İngiltərənin “Arsenal” klubundan “Barselona”ya təzəcə keçən Sesk Fabreqas fərqlənib. Oyunun yekun hesabını müəyyənləşdirən qol Lionel Messinin mükəmməl ötürməsindən sonra vurulub. Oyunun sonlarına yaxın “Portu”nun iki oyunçusu - Rolandu (86-dı dəqiqə) və Fredi Quarin (90-cı dəqiqə) qırmızı kart alaraq meydandan qovulublar. Beləliklə, “Barselona” dördüncü dəfə UEFA Superkubokunu qazanmış oldu. Klub 1992, 1997 və 2009-cu illərdə də bu uğura imza atmışdı. Hələlik kubokların sayına görə rekord “Milan”a məxsusdur. İtaliya klubu beş dəfə Superkuboka sahib olub. Bununla belə, “Superkubok” uğrunda yarışlarda iştiraka görə üstünlük “Barselona”dadır - 8 dəfə. Qeyd edək ki, UEFA Superkuboku uğrunda mübarizəni Çempionlar Liqası və Avropa Liqasının qalibləri aparır.
