Rəsmi iddiaya görə, "məqsəd keçmişdə baş vermiş cinayətin araşdırılması” olub. Söhbət 24 il əvvəl – 2001-ci ildə Səfərov qardaşlarının kafesində baş vermiş hadisədən gedir. Hərçənd ki, 24 il əvvəlin hadisəsinə əsasən azərbaycanlıların evlərinə edilən hücum və soydaşlarımızı döyə-döyə qətlə yetirilməsi Rusiyada qeyri-ruslara qarşı şovinizmin və diskriminasiyanın ən yüksək səviyyədə olduğundan xəbər verir.
Eyni zamanda, azərbaycanlılara qarşı törədilən hücumların sırf siyasi məqsədlərinə diqqət çəkir.
Hücuma məruz qalmış Səfərovlar ailəsinin üzvü Məhəmməd Səfərov deyir ki, onlara "ya Ukraynada müharibəyə getməlisiniz, ya da sizi öldürəcəyik” deyiblər. Təkcə bu fakt Rusiyanın Ukrayna müharibəsinə miqrant və qeyri-rus vətəndaşlarını cəlb etmək siyasətini ifşa edir.
Rusiyanın müharibədə ciddi itkilər verdiyi məlumdur. Son dövrlər Rusiya rəhbərliyi bu itkiləri kompensasiya etmək üçün miqrantları və qeyri-rus vətəndaşlarını səfərbərliyə cəlb etməyə çalışır.
Rusiya İstintaq Komitəsinin rəhbəri Aleksandr Bastrıkin də etiraf edir ki, Rusiya vətəndaşlığını almış 20 min nəfər Ukraynada döyüş bölgəsinə göndərilib:
"Hərbi istintaq idarəmiz reydlər keçirir. Cəbhə bölgəsinə getmək istəməyən, hətta hərbi komissarlığa gəlmək istəməyən 80 min Rusiya vətəndaşını saxlamışıq, onları hərbi qeydiyyata almışıq və artıq 20 min gənci cəbhə bölgəsinə göndərmişik”.
Rusiya Ukraynada müharibəyə əsgər cəlb etmək üçün sözün əsl mənasında "ova” çıxıb. Məlumatlara görə, Rusiyanın müvafiq orqanları vətəndaşlığı olan qeyri-rus əsilli insanlara çağırış vərəqəsi göndərir, yaxud həbs edərək, hərbi komissarlığa aparır. Onları "ya müharibəyə gedəcəksiniz, ya da pasportlarınızı alacağıq, haqqınızda cinayət işi açacağıq” təhdidi ilə şantaj edirlər. Bir çox hallarda isə saxlanılan şəxsləri müharibəyə getməyə razı salmaq üçün narkotik daşınması, cinayət törətməsi kimi ittihamlarla təhdid edirlər, hətta ailələrini həbs etməklə qorxudurlar. Qorxu qarşısında müharibəyə getməyə razı olan şəxslər isə "top yemi”nə çevrilməsə və geri qayıtsa belə, kompensasiya ala bilmir, əvəzində cəbhənin başqa istiqamətlərinə göndərilirlər. Yekaterinburqda azərbaycanlılara edilən hücumun əsas səbəblərindən biri onları Rusiyanın işğalçı müharibəsinə qoşulmağa məcbur etmək məqsədi daşıyır. Bunu qəbul etməyən soydaşlarımız "OMON”çular tərəfindən qətlə yetirilir. Bu, qətl aktına görə məsuliyyətin birbaşa Rusiya rəhbərliyinin üzərinə düşməsi deməkdir.
Azərbaycanlılara edilən hücumların indi baş verməsinin arxasında Moskvanın rəsmi Bakıya təzyiq siyasətinin də dayandığını deyə bilərik. Çünki ötən ilin 25 dekabrında Bakı-Qroznı marşrutu ilə uçan AZAL-ın mülki təyyarəsi Çeçenistanda Rusiya hava hücumundan müdafiə sistemləri tərəfindən vurulandan sonra rəsmi Bakı baş vermiş hadisənin araşdırılması, cinayətkarların cəzalandırılması, kompensasiyanın ödənilməsi kimi haqlı tələblərindən geri çəkilmir. Məsələni ört-basdır etməyə çalışan Rusiya isə müxtəlif təzyiq yolları ilə Azərbaycanı geri addım atmağa məcbur etməyə çalışır. Misal üçün, Milli Məclisin deputatı Azər Badamovun Həştərxanda keçirilən tədbirə buraxılmaması və deportasiya edilməsi, Rusiya tərəfindən media resurslarımıza qarşı kiber hücumların edilməsi və s. belə addımlardandır.
Lakin Azərbaycan mülki təyyarəmizin vurulmasını unutmayıb və artıq məsələni beynəlxalq müstəviyə çıxarır. Rusiyada bunu həzm edə bilmirlər və görünür, rəsmi Bakının milli maraqlara əsaslanan müstəqil siyasətinin qarşısını soydaşlarımıza hücum etməklə almağa çalışırlar.
Rusiyada digər xalqlara qarşı ənənəvi diskriminasiya siyasəti mövcuddur. Lakin azərbaycanlılara hücum, ümumilikdə baş verən son hadisələr müsəlman xalqlarına, bu ölkədə yaşayan və ya ora gedən müsəlmanlara qarşı da açıq təzyiqlərə start verildiyini göstərir.
Görünən odur ki, Ukrayna bataqlığından çıxa bilməyən Rusiya düşüncəsiz formada "sağ-sola hücum etməklə” xilas olmağa çalışır. Lakin bu cür siyasət Rusiyanı daha dərin bataqlığa sürükləyə bilər.
Vasif Həsənli
