Bərdə Rayon Mərkəzi Xəstəxanasında cərrah çatışmazlığı ilə bağlı görüntülər yayılıb.
AZXEBER.COM xəbər verir ki, yayılan görüntülərdə xəstəxanaya müraciət edən vətəndaşlar cərrahın olmamasından şikayət ediblər.
Onlar bildiriblər ki, cərrah müdaxiləsinə ehtiyacı olan üç xəstə var, lakin xəstəxanada yalnız bir cərrah fəaliyyət göstərir.
Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) AZXEBER.COM-a bildirilib ki, videogörüntülər 25 iyul 2026-cı il tarixində saat 18:20 radələrində Bərdə Rayon Mərkəzi Xəstəxanasının Təcili Tibbi Yardım şöbəsində qeydə alınıb:
"Yayılan videogörüntülər 25 iyul 2026-cı il tarixində saat 18:20 radələrində Bərdə Rayon Mərkəzi Xəstəxanasının Təcili Tibbi Yardım şöbəsində qeydə alınıb. Həmin vaxt yol-nəqliyyat hadisəsi nəticəsində xəsarət almış bir neçə şəxs, eyni zamanda digər təxirəsalınmaz tibbi yardım tələb edən pasiyentlər xəstəxanaya müraciət edib. Hadisə qeyri-iş saatlarında baş verdiyindən tibbi xidmət təsdiq edilmiş növbətçilik qrafikinə uyğun olaraq növbətçi həkim heyəti tərəfindən həyata keçirilib. Bütün müraciətlər triaj prinsiplərinə əsasən qiymətləndirilib və zəruri tibbi müdaxilələr vaxtında icra olunub.
Həmçinin bildirilib ki, həkim əməliyyat apardığı üçün müdaxilə edə bilməyib: "Hadisə zamanı xəstəxananın iki cərrahı həyati təhlükəsi olan pasiyent üzərində əməliyyat apardığından onların digər tibbi xidmətə cəlb edilməsi mümkün olmayıb. Bununla yanaşı, eyni anda daxil olan müraciətlərin sayı çox olduqda zərurət yaranarsa, müvafiq ixtisaslar üzrə həkimlər operativ şəkildə tibbi xidmətə cəlb olunur”.
Günel Hüseynli
