Siyasi şərhçi Aydın Quliyev bu gün AZTV-də yayımlanan "Hədəf" verilişinin qonağı olub.
AZXEBER.COM xəbər verir ki, verilişdə çıxışı zamanı o, Prezident İlham Əliyevin jurnalistikaya dair fikirlərinin dərin və çoxqatlı mənalar daşıdığını bildirib:
"Cənab Prezidentin söylədiyi fikirlər sadəcə təqdir deyil, eyni zamanda dərindən düşünüləsi, sətraltı mesajlar da verir. Çünki biz yaxşı bilirik ki, hansı illəri keçmişik. Xüsusilə müstəqilliyimizin ilk illərində – informasiya blokadası, informasiya müharibəsi dövründə sözümüzü dünyaya çatdıra bilmirdik. 20 Yanvar faciəsini yaşamışdıq, Xocalı soyqırımı baş vermişdi, amma səsimiz eşidilmirdi. İndi isə Xankəndidən dünyaya mesajlar verə bilirik. Bu, çox ciddi bir göstəricidir.”
Aydın Quliyev qeyd edib ki, bir zamanlar Azərbaycanın xarici ölkələrin mediasında müdafiə olunması üçün müxtəlif təşəbbüslər göstərilsə də, nəticə uğurlu olmadı:
"O dövrdə çalışırdıq ki, xarici ölkələrin media orqanlarında Azərbaycana münasibəti dəyişək, tərəfdaşlar tapaq, ölkəmizin maraqlarını müdafiə edən media dairələri formalaşdıraq. Amma bununla paralel olaraq daxildə milli medianı gücləndirməyə yönələn siyasət daha səmərəli nəticə verdi. Bu gün Azərbaycan mediası yalnız müdafiə mövqeyində dayanan orqan deyil, həm də hücum edən, haqqı tələb edən güclü platformaya çevrilib.”
Quliyev həmçinin Qərb mediasının "müstəqil və tərəfsiz” imici ilə çıxış etməsinə baxmayaraq, əslində onların geosiyasi alət kimi istifadə olunduğunu bildirib:
"Dünyanın aparıcı media orqanları – New York Times, The Guardian, BBC, TF1 və digərləri əslində müstəqil deyillər. Onlar Qərb dövlətlərinin maraqlarına xidmət edən vasitələrə çevriliblər. Müharibə dövründə bu tam aydın şəkildə üzə çıxdı. Fransız jurnalistin balanslı reportajına görə linç edilməsi bunu bir daha sübut etdi. Mediada obyektivlik görüntüsü olsa da, arxasında dövlətlərin ideoloji maraqları dayanır.”
O, Azərbaycanın bu baxımdan fərqli olduğunu və media ilə dövlət arasında qarşılıqlı birliyin formalaşdığını vurğulayıb:
"Azərbaycanda isə medianı da, dövləti də millət formalaşdırır. Bu gün media ilə dövlətin birliyi həm müdafiə, həm də hücum mövqeyində nəticə verə bilir. Əgər bizim mediamız xarici anti-Azərbaycan kampaniyaları ifşa edə bilirsə və bu istiqamətdə real nəticə əldə olunursa, bu, dövlətlə medianın birliyinin təzahürüdür.”
Aydın Quliyev qeyd edib ki, bu birlik tarixi mərhələlərdə mövcud olmayıb:
"19-cu əsrin ortalarında mətbuatımız milli ruhlu Həsən bəy Zərdabi kimi ziyalıların təşəbbüsü ilə yaransa da, dövlət yad idi. Sovet dövründə isə həm dövlət, həm media yabançı idi. Amma bu gün həm dövlət, həm də mətbuat millətindir, xalqındır.”
Siyasi şərhçi çıxışının sonunda Prezident İlham Əliyevin media ilə dövlətin vəhdətinə dair fikirlərinə istinad edərək bildirib:
"Prezidentimizin qeyd etdiyi kimi, dövlətlə medianın birliyi təkcə Azərbaycanın maraqlarını qorumaqla kifayətlənmir, eyni zamanda xaricdən gələn hücumları da neytrallaşdırmaq gücünə malikdir. Bu isə Azərbaycan jurnalistikasının və dövlətinin böyük nailiyyətidir.”
Oksana Orucova
