"Azərbaycan xalqına, dövlətinə qarşı çıxış edən, xarici qüvvələrin maraqlarının keşiyində dayanan, Vətəninə xəyanət edən istənilən şəxsin, bu gün və ya sabah ədalət məhkəməsi qarşısında dayanacağına, layiqli cəzasını alacağına qətiyyən şübhə etmirəm”.
Bu sözləri AZXEBER.COM-a açıqlamasında Ramiz Mehdiyevin Rusiyaya yazdığı məktubla bağlı danışan deputat Elçin Mirzəbəyli deyib.
O bildirib ki, kimliyindən asılı olmayaraq, bütün cinayətkar əməllərin daşıyıcıları eyni aqibətlə qarşılaşacaqlar:
"Əgər vaxtilə Azərbaycanın suverenliyinə, ərazi bütövlüyünə "meydan oxuyan”, xalqımıza və dövlətimizə qarşı ağır hərbi cinayətlər törədən şəxslər bu gün ölkəmizin paytaxtında məhkəmə qarşısında dayanıblarsa, kimliyindən asılı olmayaraq, bütün cinayətkar əməllərin daşıyıcıları eyni aqibətlə qarşılaşacaqlar.
Uzun illər boyu ölkəmizdə yenilikçi düşüncəyə qənim kəsilən və sistemdənkənar əyləc funksiyasını yerinə yetirən Ramiz Mehdiyevə gəldikdə isə, onun aqibəti göz qabağındadır. Onunla eyni əyri yolları yanaşı addımlayan kim və ya kimlər varsa, təbii ki, istintaq tərəfindən müəyyən edilərək mühakimə olunacaq. Və yaxud artıq müəyyən ediliblər”.
Parlamentari vurğulayıb ki, Ramiz Mehdiyevin yazdığı xəyanət məktubundan da onun dövlətə xəyanətə gətirib çıxaran hikkəsinin, qəzəbinin izlərini görmək mümkündür:
"Mehdiyevin xəyanət ssenarisində, vaxtilə özünün təmsil olunduğu və iddia etdiyi bütün təsisatların üzərindən xətt çəkilir. Bütün bunlar onun haqqında hər şeyi deyir. Çünki Mehdiyev kimi insanlar hər şeyin özləri ilə bitməsini istəyirlər, şəxsi iddiaları isə dövlət mənafeyini, ictimai maraqları dəfələrlə üstələyir”.
Şahanə Ziyad
