Milli Məclisin deputatı Azər Allahverənov "Hədəf” verilişində çıxışı zamanı Zəngəzur dəhlizi ətrafında baş verən proseslərə dair mühüm açıqlamalar verib.
AZXEBER.COM xəbər verir ki, deputatın sözlərinə görə, Zəngəzur dəhlizi sadəcə Azərbaycanla Ermənistan arasında olan bir məsələ deyil və bu layihə daha geniş geosiyasi əhəmiyyət daşıyır.
"Əgər bu, yalnız Azərbaycanın əsas ərazisi ilə Naxçıvan Muxtar Respublikası arasında olan məsələ olsaydı, çoxdan öz həllini tapmışdı. Burada çox gedişli bir kombinasiya baş verir və bu, strateji əhəmiyyət daşıyan bir layihənin gerçəkləşməsindən xəbər verir”, – deyə deputat bildirib.
Allahverənov qeyd edib ki, bir çox dövlətlər Zəngəzur dəhlizinin açılmasına açıq şəkildə qarşı çıxmasalar da, bu layihədən öz maraqları naminə istifadə etmək niyyətindədirlər: "Hətta əleyhinə çıxış edən bəzi dövlətlər sonradan bu mövqelərini ört-basdır etməyə çalışsalar da, əslində əsas məqsədləri Zəngəzur dəhlizindən maksimum fayda götürmək olub”.
Deputat həmçinin Azərbaycan-İran münasibətlərinə toxunaraq bildirib ki, bu münasibətlərin pozulmasında maraqlı olan qüvvələr Araz dəhlizi ilə bağlı prosesləri də ləngitməyə çalışıblar: "Zaman-zaman bu istiqamətdə cəhdlər olub. Lakin Azərbaycan beynəlxalq görüşləri tamam fərqli məqsədlərlə həyata keçirir və bu, bütövlükdə bölgədə təhlükəsizliyin təmin olunmasına xidmət edir. Bu məsələ, eyni zamanda, İran üçün də maraqlı olmalıdır”.
O, ABŞ-nin regionda fəallaşmasının Araz dəhlizi məsələsinə də təsir etdiyini bildirib: "Vaşinqtonun son proseslərdə fəallaşması, eyni zamanda, Araz dəhlizi ilə bağlı məsələlərdə İran tərəfinin – xüsusilə də prezident Pezeşkianın şəxsi mövqeyi və bütövlükdə İranın bu məsələdə müəyyən qırmızı xətlərdən geri çəkilməsi onu göstərdi ki, gec-tez Araz dəhlizi istifadəyə veriləcək”.
Azər Allahverənov hesab edir ki, bu baş verdikdən sonra Zəngəzur dəhlizi əvvəlki strateji əhəmiyyətini müəyyən qədər itirə bilər: "Ona görə də maksimum çalışırlar ki, bu proseslər paralel şəkildə inkişaf etdirilsin. Azərbaycan istənilən halda hər iki alternativdə maraqlıdır”.
Oksana Orucova
