"Qarabağ”ın yarımmüdafiəçisi Əfran İsmayılov komandadan ayrılmaq qərarı verib.
Bu haqda futbolçu özü bildirib. Onun sözlərinə görə, bununla bağlı baş məşqçi Qurban Qurbanovla söhbəti olub.
“Hələ ki, komandadan tam ayrılmamışam. Müqaviləm hələ gələn ilin mayında başa çatır. “Qarabağ”dan getmək haqda fikrimi baş məşqçiyə çatdırdım. Onlar da sağ olsunlar, mənə problem yaratmayacaqlarını bildiriblər. Transferim zamanı da son söz klubda olacaq”.
Əfran İsmayılov başqa bir kluba keçmək istəməsi ilə bağlı qərarını mövsümün gedişatı zamanı açıqlamasını belə izah edib: “Mən ona görə belə addım atdım ki, qəfil gedişim “Qarabağ”a problem yaratmasın. Yəni klub artıq indidən bilir ki, yerimə futbolçu axtarmaq lazımdır”.
Ə.İsmayılov bildirib ki, “Qarabağ”dan getmək haqda qərarını verdikdən sonra baş məşqçi Qurban Qurbanovun istəyi ilə komandada məşq etmir: “Bu onunla bağlıdır ki, gedişatım komandamızın üzvlərinə pis təsir edə bilər”.
Karyerasını “Neftçi”də davam etdirəcəyi ilə bağlı məlumatlara gəlincə, Ə.İsmayılov danışıqlar apardığı klubların adını açıqlamayıb: “Amma “Qarabağ”dan getsəm, yenə də Azərbaycanda oynayacağam”.
