"Qanun hamı üçün eynidir. Vəzifəsindən və mövqeyindən asılı olmayaraq, hər bir Azərbaycan vətəndaşı qanun qarşısında cavabdehdir. Bu həm iqtidar nümayəndələrinə, həm də də müxalifəti təmsil edənlərə aiddir”.
Bu fikirləri AZXEBER.COM-a açıqlamasında Milli Məclisin deputatı Tahir Rzayev deyib.
O vurğulayıb ki, dövlətə xəyanət bir cinayətdir:
"Dünən vəzifəli bir şəxs fəaliyyətinə və göstərdiyi müəyyən xidmətlərinə görə dövlət tərəfindən mükafatlandırıla və ona etimad göstərilə bilər. Lakin sonradan əgər o, öz fəaliyyətində səhvlərə yol verirsə, dövlət əleyhinə zidd yollara düşürsə, sözsüz ki, onun əvvəlki xidmətləri heç bir əhəmiyyət kəsb etmir. Ramiz Mehdiyev haqqında deyilənlərə də aiddir. Yüksək postda uzun illər çalışmış, lakin son illərdə fəaliyyətində ciddi nöqsanlara yol vermiş bir insanın bu gün cəzalandırılması qanunlarımıza tamamilə uyğundur. Müxalifət müəyyən məsələlərə və problemlərə öz münasibətini bildirə bilər. Ancaq dövlətə xəyanət etmək, çevriliş cəhdləri göstərmək, müəyyən insanlarla əlaqədə olmaq və konstitusiyanın verdiyi hüquqları ciddi şəkildə pozmaq bir cinayətdir”.
Parlamentari qeyd edib ki, Əli Kərimli haqqında ciddi faktlar mövcuddur:
"Əli Kərimli barəsində 2 ay 15 gün həbs qətimkan tədbiri seçilib. Bu, araşdırmaların və tədqiqatların nəticəsidir. Əldə çox ciddi faktlar var. Araşdırmalar göstərir ki, Əli Kərimli həqiqətən dövlətə xəyanət yolunu tutub. O, xarici havadarları və onu dəstəkləyən xarici qüvvələrlə əlaqəyə girərək Azərbaycanda dövlət çevrilişi etmək, hakimiyyəti zorla ələ keçirmək təşəbbüsündə olub. Onun çıxışlarından da bunu aydın görmək mümkündür. O, dəfələrlə bu tip çıxışlar edib. Ancaq Azərbaycan dövləti humanist mövqe tutaraq lazımi vaxta qədər bu çağırışlara sərt reaksiya verməyib. Müxalifətin tərbiyə olunmasını və öz yoluna qayıtmasını məqbul hesab etmişdir. Lakin son hadisələr və əldə olan məlumatlar göstərir ki, artıq başqa çıxış yolu yoxdur”.
"Əgər Əli Kərimli, Cəmil Həsənli və digər müxalifət nümayəndələri hakimiyyətin zorla ələ alınması barədə planlar hazırlayaraq çağırışlar edirlərsə, onlar mütləq həbsə məhkumdurlar. Bu mövqedə olan hər bir insan öz cəzasını almalıdır. Vətəninin, xalqının gələcəyi haqqında düşünən hər bir vətəndaş bu fikirdədir”-, deyə deputat bildirib.
Şahanə Ziyad
