FIFA Avropa qitəsindən olan milli assosiasiyalar üçün sayca ikinci seminarını keçirib.
90plus.az xəbər verir ki, Fransanın paytaxtı Parisdə təşkil olunmuş tədbirə UEFA-ya üzv olan 15 ölkənin nümayəndələri qatılıb.
Əsas diqqət futbolun inkişafı sahəsində əməkdaşlığa, habelə FIFA-nın "Forward" və Qadın futbolu proqramları, "Məktəblərdə futbol" layihəsi proqramının inkişafına yönəlib.
FIFA-nın Avropa Milli Assosiasiyaları Departamentinin direktoru Elxan Məmmədov belə tədbirlərin əhəmiyyətindən danışıb: "Bunlar həm FIFA, həm də üzv assosiasiyalar üçün vacibdir. Seminar milli qurumlara əlavə dəstək imkanlarına həsr olunub. Belə görüşlər müştərək iş imkanlarımızı əhəmiyyətli dərəcədə genişləndirir və futbolu həqiqətən də qloballaşdırır. İlk seminarımız uğurlu keçib. Bu, uzun seriyalı ilk seminar olacaq. Çünki biz digər ölkələrdə və şəhərlərdə də belə tədbirlər keçirmək niyyətindəyik. Məqsədimiz üzv ölkələrin daha çox faydalandığına əmin olmaqdır".
Tədbirdə iştirak edən AFFA-nın baş katibi Sərxan Hacıyev isə FIFA-ya çox faydalı seminar keçirdiyi üçün təşəkkürünü bildirib: "Belə görüş forması çox vacibdir, çünki məhsuldar fikir mübadiləsinə aparır. Sonra biz öz ofisimizə informasiyaları ötürür və müxtəlif aspektlər üzərində işləməyə davam edirik. AFFA üçün öz mövqeyini FIFA ilə müzakirə etmək, FIFA üçün isə bunları diqqətə almaq imkanı yaranıb. Bu, bütün üzv milli assosiasiyaların və futbolun inkişafı üçün yalnız müsbət amil ola bilər".
Qeyd edək ki, ilk seminar FIFA prezidenti Canni İnfantinonun iştirakı ilə keçirilib.
