Türkiyənin xarici işlər naziri Hakan Fidan Ermənistanla münasibətlərin normallaşması ilə bağlı mövqeyini açıqlayıb. O bildirib ki, Ankara üçün əsas şərt Azərbaycan və Ermənistan arasında yekun sülh sazişinin imzalanmasıdır.
Ermənistanın xarici işlər naziri Ararat Mirzoyan isə bu gün verdiyi açıqlamada bildirib ki, rmənistan hər iki istiqamətdə səmimi səy göstərir. Bu iki komponentin heç biri digəri ilə şərtlənmir, onlar arasında səbəb-nəticə əlaqəsini aşkar etməyə çalışsaq, Türkiyə ilə münasibətlərin tam normallaşmasının Ermənistanla Azərbaycan arasında münasibətlərin normallaşması prosesinə mənfi təsir göstərməyəcəyi, əksinə, müsbət təsir göstərəcəyi ortaya çıxa bilər.
Türkiyənin Azərbaycandakı keçmiş hərbi attaşesi, ehtiyatda olan general Yücel Karauz AZXEBER.COM-a açıqlamasında deyib ki, Türkiyə Ermənistanla normallaşmanı Azərbaycan–Ermənistan arasında sülh sazişi imzalanmadan heç vaxt tam şəkildə həyata keçirməyəcək:
Türkiyə Ermənistanla normallaşmanı Azərbaycan–Ermənistan arasında sülh sazişi imzalanmadan heç vaxt tam şəkildə həyata keçirməyəcək. Türkiyə və Ermənistan arasında görüşlər keçirilə, yol xəritəsi hazırlanaraq addımlar müəyyən edilə bilər. Ermənistan Baş naziri Nikol Paşinyan və Azərbaycan Prezident İlham Əliyev sülh müqaviləsinə imza atarlar, Türkiyə də həmin yol xəritəsində öz üzərinə düşən öhdəlikləri yerinə yetirər.
Türkiyənin keçmiş dövlət təcrübəsində ona verilən sözlərin sonradan yerinə yetirilməməsi ilə bağlı çoxlu nümunələr mövcuddur. Avropa Birliyi ilə bağlı da belə nümunələr var, NATO ilə bağlı da. Buna görə Ermənistan xarici işlər nazirinin "Türkiyə ilə normallaşsaq, Ermənistan–Azərbaycan münasibətləri də normallaşar” deməsi doğru yanaşma deyil. Bizim belə sözlərə "qarnımız toxdur””.
Ekspert bildirib ki, Əgər hər şeyin qaydasına düşməsini istəyirlərsə, sülh sazişi imzalanmalıdır:
"Azərbaycan və Türkiyə ilə barışmaq niyyətləri varsa, bunun birinci şərti sülh sazişinin imzalanmasıdır. Amma qeyd etdiyim kimi, artıq bir mexanizm yaradılıb, qarşılıqlı görüşlər keçirilir. Yəni mərhələli şəkildə hansı addımların atılacağına dair bir yol xəritəsi müəyyən edilə bilər. Onsuz da Türkiyə–Ermənistan danışıqlarında bu məsələlər müzakirə olunub. Ermənistan öz daxili siyasi mexanizmləri və xalqa verəcəyi mesajlara görə prosesi uzadır. Türkiyə öz öhdəliklərini yerinə yetirə bilər, amma sülh sazişi imzalanmadan tam şəkildə normallaşma mümkün deyil. Türkiyənin doğru mövqeyi budur”.
"Əgər belə olmasaydı, Ankara 32 ildən artıqdır bağlı olan Ermənistan sərhədini açmaqdan çəkinməzdi. Türkiyə, Ermənistan və beynəlxalq siyasət baxımından da tutarlılıq, dürüstlük və hüquq bunu tələb edir”-,deyə general qeyd edib.
Şahanə Ziyad
