"Bu gün media nümayəndələri, jurnalistlər yalnız informasiya yayıcısı kimi deyil, eyni zamanda günümüzün ən böyük problemlərindən olan dezinformasiya və saxta xəbərlər ilə mübarizə aparan rolunda da fəal olmalıdır”.
AZXEBER.COM xəbər verir ki, bu sözləri İsmayıllı rayonunda Baş Prokurorluğun təşkikatçılığı ilə keçirilən "Müasir çağırışlar fonunda dövlət, media və vətəndaş cəmiyyəti əməkdaşlığı" adlı konfransda çıxışı zamanı Mətbuat Şurası İdarə Heyətinin üzvü Hacıbəy Heydərli deyib.
O qeyd edib ki, cəmiyyətin hər bir fərdi media savadlılığına yiyələnməlidir:
"Sosial şəbəkələrin sayəsində feyk xəbərlər, dezinformaiyalər bəzən bir neçə saat ərzində milyonlarla insana çata bilir. Yanlış məlumatın yayılması üçün saniyələr kifayətdir, amma həmin məlumatın yaratdığı yanlış təsəvvürü aradan qaldırmaq günlər, hətta həftələr tələb edə bilər. Bu baxımdan da dövlətimiz tərəfindən media savadlılığı layihəsi həyata keçirilir. Cəmiyyətimiz media savadlılığına yiyələnməlidir ki, bu tip məlumatlara aldanmasın”.
Hacıbəy Heydərli süni intellektin mediaya təsiri haqda da danışıb:
"Süni intellekt media üçün böyük imkanlar yaradır. Jurnalist işini sürətləndirir, məlumatların təhlilinə kömək edir, yeni kontent formalarının yaranmasına şərait yaradır. Amma digər tərəfdən, süni intellektlə hazırlanmış saxta görüntülər, səslər və videolar - deepfake texnologiyaları - informasiya mühitində etimad problemini daha da dərinləşdirə bilər”.
O qeyd edib ki, dövlət, media və vətəndaş cəmiyyətinin birlikdə hərəkət etməlidir:
"Gələcəyin mediasında əsas dəyər yalnız sürət və operativlik olmayacaq. Əsas dəyər etibar və inam olacaq. Bu mübarizədə dövlət, media və vətəndaş cəmiyyətini birlikdə hərəkət etməlidir.
Dövlət, media və vətəndaş cəmiyyəti bir-birinin alternativi deyil, eyni informasiya ekosisteminin fərqli və vacib tərəfləridir. Bu əməkdaşlığı nə qədər gücləndirsək, cəmiyyətimiz yanlış məlumatlara qarşı bir o qədər dayanıqlı olacaq.
