"8 avqustda Vaşinqtonda Azərbaycan-Ermənistan sülh prosesi üzrə ortaya qoyulan iradə və Ermənistanla normallaşma prosesində əldə etdiyimiz irəliləyiş bölgədə çoxdan gözlənilən davamlı sülhə ümidləri gücləndirib".
Bunu Türkiyənin xarici işlər naziri Hakan Fidan parlament komissiyasındakı çıxışı zamanı bildirib.
O, Azərbaycanla ikitərəfli və çoxtərəfli platformalarda müstəsna münasibətlərin davam etdiyini qeyd edib:
"Cənubi Qafqazda sülh və sabitliyin bərqərar olması, o cümlədən Qarabağın yenidən qurulması və dirçəldilməsi səylərində müttəfiqimiz Azərbaycanla koordinasiya və həmrəylik içində hərəkət etməyə davam edirik", - deyə nazir vurğulayıb.
Fidan Ermənistanın Türkiyə və Azərbaycana qarşı konstruktiv yanaşmasını alqışlayıb:
"Biz ölkəmizlə münasibətlərin normallaşdırılması istiqamətində açıq və istəkli mövqe nümayiş etdirən Ermənistanla müxtəlif səviyyələrdə dialoqumuzu, atıla biləcək konkret addımlar üzərində birgə səylərimizi səmimi şəkildə davam etdiririk. Türkiyə lap əvvəldən Cənubi Qafqazda sülhün bərqərar olması və bölgədə ortaq rifah məkanı yaratmaq üçün səy göstərir", - Fidan bəyan edib.
O xatırladıb ki, Azərbaycan və Ermənistan bu tarixi fürsətdən istifadə etməyə və sülh müqaviləsini mümkün qədər tez bağlamağa təşviq olunur.
/Oxu.az
