HƏMAS Siyasi Bürosunun üzvü Qazi Həmad bildirib ki, təşkilat Qəzzada hərtərəfli atəşkəsi nəzərdə tutan paket razılaşmanı qəbul edib.
AZXEBER.COM xarici mətbuata istinadən xəbər verir ki, Həmadın sözlərinə görə, razılaşma İsrail qoşunlarının Qəzzadan çıxarılması, bölgənin yenidən qurulması, beynəlxalq qüvvələrin yerləşdirilməsi və Fələstin Milli Komitəsinin idarəçiliyi öz üzərinə götürməsini əhatə edir.
O qeyd edib ki, tərəflər razılaşmanın ümumi prinsipləri üzrə ortaq mövqeyə gəliblər. İcra mexanizmləri və vaxt cədvəlinin müəyyənləşdirilməsi üçün isə növbəti danışıqlar mərhələsi keçiriləcək.
HƏMAS rəsmisi vurğulayıb ki, İsrail razılaşma üzrə öhdəliklərini yerinə yetirmədiyi təqdirdə, HƏMAS da öz öhdəliklərini icra etməyəcək.
"Bir mərhələ tam başa çatmadan növbəti mərhələyə keçilməyəcək", – deyə Həmad bildirib.
Onun sözlərinə görə, silahlarla bağlı razılaşmaların icrası da İsrailin ilk mərhələdə atəşkəs şərtlərini yerinə yetirməsi, Qəzzadan çıxması, Milli Komitənin fəaliyyətə başlaması, beynəlxalq qüvvələrin yerləşdirilməsi və silahlı qrupların ləğv edilməsi ilə şərtləndirilir.
Həmad əlavə edib ki, razılaşmada ağır silahların İsrail öhdəliklərini yerinə yetirdikdən sonra Fələstin Milli Komitəsinin nəzarətində saxlanılması da nəzərdə tutulur.
Bundan başqa, razılaşmanın icrasına nəzarət edəcək beynəlxalq komitənin yaradılması da paketə daxildir.
Gülay
