Bu gün yayımlanan "Hədəf" verilişində qonaq olan iqtisadçı Emin Qəribli Azərbaycan-Türkmənistan münasibətlərinə toxunaraq, enerji və nəqliyyat sahələrinin regional əməkdaşlıqda əsas amil olduğunu bildirib.
AZXEBER.COM xəbər verir ki, onun sözlərinə görə, enerji faktoru bu münasibətlərdə xüsusi rol oynayır:
"Türkmənistan dünyanın ən zəngin qaz ehtiyatlarına malik ölkələrindən biridir. Bu ölkə enerji baxımından strateji əhəmiyyət daşıyır. Bundan əlavə, artıq qeyd etdiyimiz kimi, Şərq-Qərb nəqliyyat dəhlizi də məhz Azərbaycan ərazisindən keçir. Bu səbəbdən enerji və nəqliyyat sahələri bu gün regional əməkdaşlığın əsasını təşkil edir və gələcəkdə digər enerji layihələrinin inkişafına da zəmin yaradır".
Emin Qəribli həmçinin iki ölkə arasında artan ticarət dövriyyəsinə də diqqət çəkib:
"Bugünkü ticarət dövriyyəsinə baxsaq, görərik ki, artıq 800 milyon dollara çatıb. 2022-ci il 2021-ci illə müqayisədə, 2023-cü il isə 2022-ci illə müqayisədə əhəmiyyətli artım müşahidə olunub. Bu da göstərir ki, iqtisadi maraqlar nəzərə alınmadan bu cür inkişaf mümkün deyil. Biz qazı İrandan 180-250 dollar civarında alırıq, daha sonra ixrac etdiyimiz qazı 300-500 dollar arası qiymətə satırıq. Bu, ölkəmiz üçün həm səmərəli, həm də dayanıqlı qaz təchizatını təmin edən mexanizmdir. Sabit boru kəmərləri sayəsində biz enerji bazarında etibarlı tərəfdaş kimi çıxış edirik".
Gələcək planlara da toxunan iqtisadçı bildirib ki, türkdilli ölkələr, o cümlədən Türkmənistan, qazının Avropaya çatdırılması məsələsini nəzərdən keçirir:
"Gələcəkdə alternativ qaz boru kəmərlərinin çəkilməsi və bu qazın Azərbaycan vasitəsilə Avropaya çatdırılması mühüm məsələlərdən biridir. Bu, həm regionun inteqrasiyası baxımından, həm də Avropanın enerji təhlükəsizliyi kontekstində strateji əhəmiyyət kəsb edir".
Qəribli bildirib ki, bölgədəki siyasi və iqtisadi qeyri-sabitlik fonunda Azərbaycan alternativsiz və etibarlı bir enerji marşrutu kimi çıxış edir:
"Şimalda və cənubda müəyyən problemlər mövcuddur. Bu səbəbdən Azərbaycan etibarlı və sanksiyalardan kənar bir enerji pəncərəsi rolunu oynayır. Türkmənistan hazırda əsasən Çinə və digər ölkələrə qaz ixrac edir, lakin Avropa bazarı da bu resurslara ciddi maraq göstərir".
Oksana Orucova
