"Jurnalistlərin yazdıqları yazılara görə məhkəməyə verilməsi presedentinə son qoyulmalıdır. Çünki son illər Azərbaycanda media sahəsində çox ciddi islahatlar aparılıb. "Media haqqında” Qanun qəbul edilib, Media Reyestri yaradılıb və jurnalistlərin peşəkarlaşması istiqamətində tədbirlər həyata keçirilir. Belə olan təqdirdə heç bir xəbərdarlıq edilmədən jurnalistin xüsusi ittiham qaydasında məhkəməyə verilməsi həm onun fəaliyyətinə, eyni zamanda ölkədə hökm sürən söz və fikir azadlığına birbaşa təhdid rolunu oynaya bilər”.
Bu fikirləri Demokrat.az-a açıqlamasında Azərbaycan Mətbuat Şurasının İdarə Heyətinin üzvü Hacıbəy Heydərli deyib. H.Heydərli bildirib ki, bu hal daha sonra beynəlxalq təşkilatların hesabatlarında Azərbaycanda media ilə bağlı duruma təsir edə bilər:
"Belə olan halda təqdirdə məmurların jurnalistləri məhkəməyə verməsini onların, əslində, öz səhvlərini ört-basdır etməsi və bir növ jurnalistləri susdurmaq niyyəti güddüyünü nəzərə alsaq, bu ənənəyə son qoyulmalıdır. Jurnalisti bu yolla susdurmaq olmaz. Çünki "Media haqqında” Azərbaycan Respublikasının Qanununda göstərilir ki, əgər jurnalist hansısa məlumatı səhv anlayıbsa, bu barədə media subyektinə əvvəlcə xəbərdarlıq edilməli, yazının silinməsi və ya düzəliş edilməsi ilə bağlı məlumat verilməlidir. Yox, əgər, heç bir xəbərdarlıq edilmədən jurnalist hansısa məmur tərəfindən məhkəməyə verilibsə, bu, birbaşa Azərbaycanda fikir və söz azadlığına təhdid kimi qiymətləndirilə bilər. Bu baxımdan, bütün məmurlara çağırış etmək istəyirəm ki, belə hallarla qarşılaşdıqda bununla bağlı müvafiq qanunun tələblərini əsas götürsünlər və bu kimi halların qarşısı alınsın”.
H.Heydərli onu da qeyd edib ki, Mətbuat Şurasının tərkibində Şikayətlər Komissiyası fəaliyyət göstərir və bu kimi xüsuslarda şikayətçi tərəflər quruma müraciət edə bilərlər:
"Bu komissiya şikayətləri obyektiv şəkildə araşdırır, həmçinin daha sonra bunu ictimailəşdirir. Əgər jurnalistin yazısında hər hansısa bir nöqsan varsa, bununla bağlı, təbii ki, qərar çıxarılır. Amma bütün bunlara baxmayaraq məhkəmə qaydası ilə jurnalist haqqında cinayət işinin açılmasını tələb etmək indiki dövrdə Azərbaycana yaraşmayan bir haldır. Dünyanın bir çox ölkəsində informasiya haqqında qanun qəbul edilib. Bu qanunun da məğzi ondan ibarətdir ki, jurnalist yazdığı yazıya görə məhkəməyə verilə bilməz. Bu qanun uzun illərdir Azərbaycanda müzakirə olunur, amma hələki qəbul olunmayıb. Belə olsa da, düşünürəm ki, məmurlar, dövlət qurumları bu məsələdə çox diqqətli olmalıdırlar. Azərbaycanda hökm sürən söz və fikir azadlığından sui-istifadə edərək jurnalisti susdurmaq mənfi hal kimi dəyərləndirilə bilər”.
