Xəbər verdiyimiz kimi, "İdrak” liseyində müəlliminə odlu silahla ağır xəsarət yetirməkdə təqsirləndirilən şagirdin cinayət işi üzrə tərəflər arasında barışıq əldə olunub. Zərərçəkmiş müəllim şagirdi bağışlayıb və bunu təsdiqləyən rəsmi sənəd istintaq orqanına təqdim edilib.
Bununla yanaşı, şagirdlə bağlı aparılan psixoloji ekspertizanın nəticələri də açıqlanıb. Rəyə əsasən, Ə.Ş-də anlaqlılığı istisna etməyən psixi pozuntu müəyyən edilib.
Hüquqşünas Ramil Süleymanov AZXEBER.COM-a açıqlamasında bildirib ki, tərəflər arasında əldə olunan barışıq təqsirləndirilən şəxsi cinayət məsuliyyətindən azad etmir:
"Bu hal yalnız yüngülləşdirici amil kimi qiymətləndirilə bilər və cəza təyin olunarkən nəzərə alınır. Son qərar məhkəmə tərəfindən veriləcək”.
Onun sözlərinə görə, təqsirləndirilən şəxs yetkinlik yaşına çatmadığı üçün ona tətbiq ediləcək cəza daha yüngül olacaq:
"Azərbaycan Respublikası Cinayət Məcəlləsinin 126-cı maddəsinə (qəsdən sağlamlığa ağır zərər vurma) əsasən, yetkinlik yaşına çatmayan şəxslərə böyüklər üçün nəzərdə tutulan cəzanın yarısı tətbiq olunur. Bu halda təxminən 3 ildən 5 ilədək azadlıqdan məhrumetmə cəzası mümkündür”.
Qeyd edək ki, hadisə bu ilin fevral ayında Bakıda yerləşən "İdrak” liseyində baş verib. İttihama görə, 10-cu sinif şagirdi Ə.Ş. atasına məxsus ov tüfəngi ilə liseyə gələrək 29 yaşlı riyaziyyat müəllimi Şəhla Kamilovanı güllələyib.
Şahanə Ziyad
