Xəbər verdiyimiz kimi, "Sabah" futbol klubu uşaq futbolunun davamlı inkişafını təmin etmək məqsədilə 10 milyon manatlıq yeni proqram yaradacaq.
Azərbaycan Prezidenti İlham Əliyevin 27 avqust 2026-cı il tarixli Sərəncamı ilə "Sabah" FK-ya UEFA Çempionlar Liqasının Liqa mərhələsinə vəsiqə qazanması münasibətilə beş milyon manat maliyyə dəstəyi ayrılıb.
"Sabah" FK isə bu vəsaitə əlavə olaraq öz vəsaitindən beş milyon manat ayırmaq qərarına gəlib.
Beləliklə, "Sabah Football Academy Future Talents" - "Sabah Futbol Akademiyası Gələcəyin İstedadları" proqramının ilkin kapitalının 10 milyon manat olması nəzərdə tutulur.
Klubun açıqlamasına görə, əsas məqsəd bu vəsaiti xərcləmək deyil, qorumaq və artırmaqdır. Vəsaitin peşəkar şəkildə idarə olunaraq gəlir gətirməsi və əldə edilən gəlirin uzunmüddətli perspektivdə gənc futbolçuların inkişafına yönəldilməsi planlaşdırılır.
Bundan əlavə, bu il UEFA Çempionlar Liqasında keçiriləcək oyunlarda bilet satışından əldə olunan vəsaitin müəyyən hissəsinin də proqrama yönəldilməsi nəzərdə tutulur.
İdman mütəxəssisi, tanınmış məşqçi Şahin Diniyev AZXEBER.COM-a açıqlamasında deyib ki, "Sabah” klubunun bu addımı çox səmərəlidir və futbolumuzun inkişafına xidmət edir:
"Çox yaxşı və səmərəli bir fikirdir. Bunu həyata keçirmək olsa, azərbaycanlı yerli futbolçuların yetişdirilməsi üçün atılan addım böyük fayda vermiş olar. Əsas məsələ bu sistemin necə qurulacağı və necə həyata keçiriləcəyidir. Bu addım futbolumuzu inkişaf etdirəcək. Uğurlar arzu edirəm!”.
Tanınmış idman şərhçisi, ekspert Kənan Məstəliyev AZXEBER.COM-a açıqlamasında deyib ki, "Sabah” klubu hər zaman uşaq futboluna böyük dəstək verib:
"”Sabah”ın atdığı addım nümunəvi bir davranışdır. Nəhayət, klublarımızdan hansısa uşaq futbolunu bu qədər ön plana çıxartmaq qərarına gəldi. Bütün klublarımızda uşaq futboluna diqqət edilməyə başlayıb, amma "Sabah” bu istiqamətdə ən öndə olanlardan biri idi. Uşaq futbolunu izləyənlər bilirlər ki, "Sabah” futbol klubunda uşaq futboluna diqqət yetərincə böyükdür. Yaradılan şərait hər tərəfdən uşaqları dəstəkləyir. Eyni zamanda, uşaqlar müxtəlif beynəlxalq turnirlərdə iştirakçıdırlar.
Məşqçi heyətinin diqqətlə seçilməsi, beynəlxalq təcrübənin daxildə tətbiq edilməsi çox önəmlidir”.
O deyib ki, Azərbaycan futbolunun gələcəyi uşaq futbolundadır:
"Bu addım isə daha böyük oldu. Yəni, həqiqətən də "Sabah” alqışlanası bir addım atır. Azərbaycan futbolunun gələcəyi uşaq futbolundadır. Ümumiyyətlə, dünyada həmişə belə olub. Uşaq futbolunu inkişaf etdirməyən ölkənin böyük futbolunu da inkişaf etdirməsi mümkün deyil. Ona görə də uşaq futboluna diqqət, qayğı və həssaslıq mühüm bir meyardır. "Sabah” klubunun da bu qədər böyük məbləği uşaq futboluna yönəltməsi sevindirici və alqışlanasıdır”.
Şahanə Ziyad
