Bir neçə müddətdir ki, sənətçilərə televiziya efirlərinə çıxması üçün qonorarın verilməsi məsələsi gündəmə gəlib. Xalq artistləri, müğənnilər efirə çıxmaq üçün qonağa qonorar verilməsinin vacibliyini qeyd edir.
Prezident təqaüdçüsü, Xalq artisti Səidə Quliyeva bu mövzuya belə münasibət bildirib: "Qonorar biz aktyorların ən yaralı yeridir. Əvvəllər, sovet dövründə televiziyada iki cümlə danışırdıq, ifa etdiyim roldan belə qat-qat artıq qonorar alırdıq. İndi isə qonorardan söhbət belə yoxdur. Bir dəfə mənə verilişlərdən birindən təklif gəldi, söylədilər ki, sizin iştirakınız özünüz üçün reklamdır. Mən bu təklifi rədd etdim, razılaşmadım. Mənim kimi bir sənətkarın heç bir reklama ehtiyacı yoxdur. Telekanallar mütləq sənətkarların efirə çıxmasına qonorar ödəməlidir. Qonorar olmadığından sənətkarlar verilişlərə çıxmaqdan imtina edirlər”, deyə bildirib.
Bəs digər sənət adamlarının efirə çıxmaq üçün qonorar verilməsi məsələsinə münasibətləri necədir?
Tanınmış aktyor və televiziya aparıcısı Elməddin Cəfərov AZXEBER.COM-a açıqlamasında məsələyə münasibət bildirib. O, qeyd edib ki, qonorarın olması yaxşıdır, amma bugünkü gündə bu, real deyil:
"Bu, ola bilər, yaxşı fikirdir, sadəcə olaraq bunun üçün əvvəlcə iqtisadiyyat bərpa olunmalıdır. Pandemiyadan sonra bütün düyada iqtisadiyyat çox zəifləyib. Burada da televiziyanın əsas maliyyə dəstəyi şirkətlərə düşür, maliyyə cəhətdən də şirkətlər zəifləyib. Belə olan halda gedib televiziyaya pul istəmək real deyil. 3 ilə, 5 ilə bu fikri reallaşdırmaq olar, amma bugünkü gündə verilişə getmək üçün əlavə qonorar istəmək düzgün deyil".
Aktyor Türkiyədə bu praktikanın olduğunu, ancaq pandemiya dönəmində kanalların sənətçilərə qonarar verməyi dayandırdıqlarını bildirib:
"Bu praktika Türkiyədə var idi, amma pandemiyadan sonra orada da dayandı”.
Müğənni, əməkdar artist Ədalət Şükürov isə AZXEBER.COM-a açıqlamasında qonorarın olmalı olduğunu deyib:
"Əslində bütün dünyada bu praktika var. Bizdə yoxdur. Başqa ölkələri, məsələn, Rusiyanı götürsək, bu praktika var. Efirə çağırırlarsa, xahiş edirlərsə, qonorar olmalıdır, bu, normal bir şeydir. Biz buna öyrəşməmişik, amma bu normaldır. Bütün dünyada belədir”.
Əməkdar artist bu praktikanın formalaşmasını arzuladığını bildirib:
"Düzdür, mən heç vaxt heç kimdən qonorar istəməmişəm. Ona televiziyanın rəhbərliyi özü təyin edir, gələn qonaq da, müğənni də ona uyğundursa, gəlib iştirak edəcək. Yəni bunlar normal bir şeydir və təəccübləndirici heç nə yoxdur. Yenə deyirəm, xarici təcrübədə çoxdan var, hələ bizə gəlib çıxmayıb”.
Xatırladaq ki, bir müddət öncə müğənni Xatirə İslam efirlərə çıxmaq üçün telekanal rəhbərlərindən qonorar istəmişdi. Xatirədən sonra müğənni Natavan Həbibi və reper Elşad Xose də efirlərdən qonorar istədiyini açıqlamışdılar. Onların bu iddiaları isə qalmaqala səbəb olmuşdu.
Aydın Nuri
