Prodüser Tarix Əliyev (Tolik) aparıcı kimi çalışdığı Xəzər TV-dən ayrılıb.
AZXEBER.COM xəbər verir ki, o işdən ayrılması haqda paylaşım edib.
"Nəhayət ki, 5 ilə yaxındır çalışdığım, məni sizə daha yaxından tanıtdıran doğma "Xəzər”imizdən ərizəmi yazaraq uzaqlaşıram. Bu müddət ərzində ola bilər ki, hansısa yalnışlıqlarım oldu. Peşəkar aparıcı və jurnalist olmasam da, bu illər ərzində bir çox peşəkar aparıcılar qarşısına çıxıb, onlara reytinqdə öz sözümü deməyi bacardım. Bunu kim dansa da, televiziya əməkdaşları çox yaxşı bilir.
Siz tamaşaçıların mənə olan sevgisi və göstərdiyi diqqət sayəsində öz sözümü deməyi bacardım. Çünki hər aparıcı tamaşaçı sevgisini qazana bilmir.
Baxmayaraq ki, Murad Dadaşov vəzifəyə gələn ilk gün "Hər şey daxil" verilişi bağlandı, amma mən bugünə qədər "Xəzər" kanalının əməkdaşı olaraq hər ay əmək haqqımı aldım. Düşünürəm ki, bu gün də ərizəmi yazmasaydım, hələ uzun müddət də maaşımı alacaqdım".
O yaxın günlərdə "Tarixin bir günü" verilişi ilə efirə qayıdacaq: "Mən, əslində, peşəkar aparıcı deyiləm, prodüserəm, amma sahəm şou-biznes olduğuna belə layihələrdə uğur qazanmağa çalışıram. Əsas odur ki, ortada qalmadım. Yeni bir iş təklifim var. "Tarixin bir günü” adlı yeni verilişlə izləyicilərin qarşısına çıxacam. Telekanalın adını yaxın vaxtda açıqlayacam”.
