"İyulun 11-də Azərbaycan Respublikasının Prezidenti İlham Əliyevin sədrliyi ilə 2023-cü ilin altı ayının sosial-iqtisadi yekunlarına həsr olunmuş müşavirədə çıxış edən Azərbaycan prezidenti ölkə daxilində baş verən mühüm məsələlərə toxundu”
Bunu AZXEBER.COM-a açıqlamasında Milli Məclisin deputatı Hikmət Babaoğlu deyib.
Onun sözərinə görə, vaxtaşırı bəzi daxili və xarici qüvvələr Azərbaycanda sabitliyi pozmağa cəhd edirlər:
"Son günlərdə ölkə daxilində baş verən bəzi hadisələrə münasibət də Prezidentin çıxışında öz əksini tapdı. Azərbaycan Prezident də Ali Baş Komandan kimi ordumuzun gücləndirilməsi məsələlərinə toxunarkən elə bunları nəzərdə tuturdu. Güclü olmağın əsas təminat komponentlərinin biri də ölkə daxilində sabitliyin olmasıdır. Biz bilirik ki, vaxtaşırı bəzi daxili və xarici qüvvələr Azərbaycanda sabitliyi pozmağa cəhd edirlər”.
Deputat qeyd edib ki ki, bəzi qüvvələr Gədəbəy rayonunun Söyüdlü kəndində baş verən hadisələrdən sui-istifadə etməyə çalışıblar:
"Azərbaycan polisinin asayişi qorumaq vəzifəsini yerinə yetirməsini polisimizə qarşı qarayaxma kampaniyasına çevirmək istədilər. Ancaq bunların heç biri baş tutmadı. Azərbaycan Prezidenti bunlara da münasibət bildirərək vətəndaşlarımızın dinc və haqlı etirazlarına dəstək verdi”.
Hikmət Babağlu bildirib ki, ölkə başçısı istənilən vəziyyətdə öz vətəndaşının haqlı mövqeyinin yanında olduğunu sübut etdi:
"Hadisələrin bu həddə çatmasında xidməti olan dövlət qurumunun yarıtmazlığından danışdı. Lazımı tədbirlərin görüləcəyini bildirdi. Ancaq bununla belə bu dinc aksiyanı Azərbaycan dövlətinə və dövlət qurumlarına qarşı kampaniyaya çevirmək istəyən təxribatçı qruplara da xəbərdarlıq etdi. Vətəndaşın qanuni etiraz hüququnun istismar edilməsi yolverilməzdir. Xaricdəki və daxildəki bəzi marginal qruplar bunu qəsdən edirlər. Belə mövqe Azərbaycan dövlətinə qarşı olan mövqedir”.
Şəbnəm Zahir
