Prezident İlham Əliyev bildirib ki, hazırda Orta Asiya, Azərbaycan, Türkiyə və Avropa ölkələrini birləşdirən yaşıl enerji dəhlizinin yaradılması istiqamətində işlər görülür. Dövlət başçısı bunu Türk Dövlətləri Təşkilatının (TDT) Dövlət Başçıları Şurasının Qəbələdə keçirilən 12-ci Zirvə Görüşündə deyib.
İlham Əliyevin sözlərinə görə, Azərbaycan Günəş, külək və su elektrik enerjisi kimi bərpaolunan enerji mənbələrinə böyük sərmayələr yatırır. Prezident qeyd edib ki, 2030-cu ilə qədər ölkənin enerji istehsalının təxminən 40 faizi bərpaolunan mənbələrin payına düşəcək.
Milli Məclisin deputatı Azər Badamov AZXEBER.COM-a bildirib ki, enerji amili Azərbaycanın xarici siyasətində önəmli yerə malikdir:
"Enerji sektoru Azərbaycanın beynəlxalq əməkdaşlığında əsas istiqamətlərdən birini təşkil edir. Ən başlıca məsələ odur ki, enerji resurslarımızın siyasətin əlində alət olmamasına, edilməməsinə xüsusi həssaslıqla yanaşırıq. Azərbaycan ənənəvi olduğu qədər, qeyri-ənənəvi resurların, günəş, külək və su elektrik enerjisinin inkişafında da maraqlıdır. Bu istiqamətdə fəaliyyətimizin ciddi nəticələri mövcuddur”.
Deputat deyib ki, Mərkəzi Asiya isə nəhəng bir coğrafiya deməkdir:
"Mərkəzi Asiya böyük bir coğrafiyadır. Azərbaycan bu coğrafiyadan Qazaxıstan və Özbəkistanla "Yaşıl enerjinin inkişafı və ötürülməsi sahəsində strateji tərəfdaşlıq haqqında saziş" imzaladı. Bu saziş sözügedən ölkələrin enerji sektorunda əməkdaşlığın yeni səhifəsinin açılması demək idi. Saziş çox önəmli bir tarixi zamanda-BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində imzalandı. Enerjinin bu yeni növü üzrə əməkdaşlığın artırılması həm bərpaolunan enerji mənbələrinin inkişafı, həm enerji təhlükəsizliyinin təmin olunması, həm də davamlı inkişaf məqsədlərinə töhfə verilməsi baxımdan vacibdir”.
Parlamentari qeyd edib ki, bu gün dünyada istixana emissiyalarının azaldılması qarşıda dayanan əsas çağırışlardan biridir:
"İqlim dəyişikliyi və ekoloji problemlər bu gün qlobal gündəmin əsas mövzularındandır. Bu yolda uğur qazanmaq üçün yaşıl enerjinin inkişafı təşviq edilməlidir. Azərbaycan bu prosesdə də təşəbbüskarlıq göstərən aktor qismində çıxış edir. Yeni reallıqlar yeni iqtisadi əməkdaşlıqları şərtləndirir. Bu ticari münasibətlərdə ekologiyaya ziyan vurulmasından mümkün mərtəbə qaçmaq lazımdır. Bu baxımdan yaşıl hidrogen və yaşıl ammonyak texnologiyalarının tətbiqi dəstəklənməlidir. Mərkəzi Asiya, Qafqaz regionu, Avropa ilə əməkdaşlıqda yeni fürsət pəncərləri aralanıb. Xəzər dənizinin dibi ilə elektrik kabelinin çəkilməsi əməkdaşlığın yeni növü deməkdir”.
A.Badamov vurğulayıb ki, Qazaxıstan-Azərbaycan-Özbəkistan arasında imzalanan Sazişin icrası məqsədilə üç ölkənin müvafiq qurumları arasında "Yaşıl Dəhliz Birliyi" adlı Birgə Müəssisə təsis edilib, rəhbər Komitə və İşçi Qrupları yaradılıb:
"Belə bir müəssisələrin və işçi qruplarının yaranması digər qeyd edilən regionlar ilə də baş tutacaq ki, bu da bərpa olunan enerji sahəsi üzrə layihələr vasitəsilə əməkdaşlığın yeni üfüqlərini müəyyənləşdirəcək.
Zəngin təbii resurslara, geostrateji mövqeyə, geniş enerji infrastrukturuna malik bu ölkələrin əməkdaşlığı tərəflərə qarşılıqlı fayda gətirəcək. İstər Avropa, istərsə də Asiya enerji bazarlarında mövqeyimiz dayanıqlı əsaslarla daha da bərkiyəcək”.
Şahanə Ziyad
