Belarus Respublikasının Qomel şəhərində Beynəlxalq Klublar Assosiasiyasının egidası altında 10-12 may tarixlərində yeniyetmələr arasında intellektual oyunlar üzrə (“Nə? Harada? Nə zaman?”, “Breyn-rinq”, komanda “Fərdi oyunu”, Yığmaların kuboku) Avropa Çempionatı təşkil olunacaq.
10 ölkədən 30 komandanın qatılacağı Çempionatda Azərbaycanı “Atəşgah” İntellektual Oyunlar Klubunun komandası “Pasha Travel”-in dəstəyi ilə təmsil edəcək. “Atəşgah” komandasının tərkibinə Günel Hüseynzadə, Eldar Zeynallı, Cəmil Muradov, Səbinə Şıxəlizadə ,Heydər Quliyev və komandanın kapitanı Cəhar Əkbərov daxildir. Gənc bilicilər may ayının 9-da yola düşürlər. Azərbaycan nümayəndə heyətinə “Atəşgah” İntellektual Oyunlar Klubunun prezidenti İlkin Yetirmişli başçılıq edir.
