Elçin Mirzəbəyli,
Milli Məclisin deputatı
Konstantin Zatulini danışdıran, sadəcə erməni diasporunun pullarıdırmı? Dumanın MDB məsələləri üzrə komitəsinin sədr müavini kimi, ən azı ideologiya və təbliğat baxımından strateji bir vəzifənin daşıyıcısı olan bu şəxsi uzun illərdən bəri Azərbaycana qarşı nifrət nitqini durmadan davam etdirməyə sövq edən həqiqətənmi sadəcə onun "ermənilərə olan sonsuz sevgisi”dir?
Zənnimcə, imperativ şəkildə belə bir iddiada bulunmaq bir az sadəlövh yanaşma olardı…
Ola bilsin ki, Zatulinin erməni sinif və tələbə yoldaşları, ortaqları ilə münasibəti onun verilən tapşırıqları daha qabarıq və daha aqressiv şəkildə yerinə yetirməsini stimullaşdırır. Amma tapşırıqları, şübhəsiz ki, Dumanın komitə sədrinin müavininə sinif və tələbə yoldaşları, ortaqları vermirlər.
Məhz bununla bağlı bir vacib məqama diqqət çəkmək istəyirəm:
2019-cu ilin yanvarında "Distributed Denial of Secrets” qrupunun fəalları rusiyalı məmurların və iş adamlarının yazışmalarını və sənədlərini əhatə edən 175 giqabaytlıq məlumat bazasını açıqlamışdılar.
Arxivdəki materialların əsas hissəsi Rusiya-Ukrayna münaqişəsinə, rus oliqarxlarının biznesinə və Kremlin Rusiya Pravoslav Kilsəsi ilə əlaqələrinə həsr olunmuşdu. Maraqlı məqamlardan biri də açıqlanan sənədlərin arasında yer alan nə az, nə çox, düz 1500 məktubda Konstantin Zatulinin adının keçməsidir.
Xatırladım ki, illər öncə "Pravoslav ekspertlər assosiasiyası” adlanan qatı mühafizəkar bir təşkilat vardı. Bu təşkilata Kirill Frolov adlı Zatulinin himayəsində olan şəxs rəhbərlik edirdi. Onların ideologiyası isə çox sadə idi: daha çox pravoslav kilsəsi tikmək və Vladimir Putinlə patriarx Kirillin ittifaqını dəstəkləmək…
Bu təşkilatla bağlı yazışmalarda hakim Vahid Rusiya partiyasından Dövlət Dumasının deputatı Konstantin Zatulin, onun seçki kampaniyası və deputat fəaliyyəti barədə məlumatlar da yer alır. Aşağıda həmin məktublarda yer alan bəzi məqamları təqdim edirəm və düşünürəm ki, nəticə çıxarmaq üçün yetərlidir:
2013-cü ildə Kirill Frolov Moskva şəhər yeparxiyasının rəhbəri Mixail Kuskovun ünvanına göndərdiyi məktubda Konstantin Zatulinlə bağlı yazır:
"Zatulin hakim komandanın üzvüdür, güc strukturlarının rəhbərliyinə yaxındır və yaxın vaxtlarda Rusiya, Belarus və Ukrayna slavyan xalqları məclisinin həmsədri seçiləcək.”
Zatulinin rəsmi tərcümeyi-halında bildirilir ki, onun atası SSRİ Dövlət Təhlükəsizliyi Komitəsinin ən yüksək mükafatı olan "Fəxri Çekist” medalı ilə təltif olunub…
Frolovun 2010-cu ildə yazdığı məktublarda isə qeyd olunur ki, Zatulinin rəhbərlik etdiyi MDB ölkələri institutunda, əsasən Federal Təhlükəsizlik Xidmətinin (FSB) istefada olan əməkdaşları çalışırlar. Və həmçinin xüsusi olaraq vurğulanır ki, "Zatulin güc strukturlarından gələn siqnallara qarşı son dərəcə həssasdır.”
Zənnimcə, əlavə şərhə ehtiyac yoxdur. Bütün sualların cavabını "işıq gələn”, "it hürən” tərəfdə deyil, fit çalınan tərəfdə axtarmaq lazımdır. Doğrudur, bu "nağıl”da da it hürür, amma fitdən sonra…
