Naftalanda Şəhər İcra Hakimiyyətinin və şəhər Mərkəzi Xəstəxanası PHŞ-nin birgə təşkilatçılığı ilə görkəmli akademik Zərifə xanım Əliyevanın anadan olmasının 100 illiyinə həsr olunmuş tədbir keçirilib.
AZXEBER.COM xəbər verir ki, tədbirdə Naftalan Şəhər İcra Hakimiyyətinin başçısı Vüqar Novruzov, şəhər Mərkəzi Xəstəxanası PHŞ-nin direktoru Samir Allahverdiyev, şəhər Ağsaqqallar Şurasının sədri Möhübbət Bədəlov, tibb işçiləri və ziyalılar iştirak edib.
ŞİH-nin başçısı çıxış edərək qeyd edib ki, yüksək elmi nailiyyətləri, xeyirxah və nəcib əməlləri ilə xalqımızın yaddaşında həmişəyaşarlıq qazanmış əməkdar elm xadimi, tibb elmləri doktoru, akademik Zərifə xanım Əliyevanın adı Azərbaycan tarixinin ən görkəmli simaları sırasına qızıl hərflərlə əbədi yazılmışdır.
Tədbirdə çıxış edən şəhər Mərkəzi Xəstəxanası PHŞ-nin direktoru Samir Allahverdiyev çıxış edərək qeyd edib ki, görkəmli alimin zəngin elmi irsi, oftalmologiyanın müxtəlif sahələri üzrə apardığı tədqiqatlar, nailiyyətlər, bunların əsasında yaratdığı əsərlər tibb elminin parlaq səhifəsidir.
Çıxış edən digər natiqlər Zərifə xanımın şərəfli ömür yolunun, zəngin elmi fəaliyyətinin hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbi olduğundan bəhs ediblər.
Sonda akademik Zərifə xanım Əliyevanın şərəfli həyat yolundan, elmi nailiyyətlərindən, ictimai xadim kimi əvəzsiz fəaliyyətindən bəhs edən videoçarx nümayiş olunub.
