İnsanlar bəzən içdikləri dərman və vurduqları iynələr səbəbindən ölümlə üzləşirlər. Belə ölüm hallarında ən çox rast gəlinən iddialardan biri antibiotiklərlə bağlı olur.
Məsələn, Quba Rayon Mərkəzi Xəstəxanasında faciəvi hadisə baş verib. 5 aylıq hamilə olan gənc qadın vəfat edib. İddialara əsasən, mərhuma antibiotik iynəsi vurulduqdan sonra vəziyyəti qəfil ağırlaşıb.
Hazırda hadisənin başvermə səbəbləri araşdırılır.
Professor Adil Qeybulla AZXEBER.COM-a açıqlamasında deyib ki, antibiotiklərə qarşı dəri sınağın özü belə xəstədə anafilaktik şoka səbəb ola bilər:
"Təəssüf ki, bu gün müxtəlif dərman preparatlarına, xüsusilə antibiotiklərə qarşı güclü allergik reaksiyalar, o cümlədən anafilaktik şok halları ilə rastlaşırıq və bu hallar artmaqdadır. Belə reaksiyaların əvvəlcədən dəqiq proqnozlaşdırılması çox çətindir. Həkim mütləq xəstədən onun allergik anamnezini soruşmalıdır: əvvəllər hər hansı dərmana qarşı allergik reaksiyası olubmu, hansı preparatlara həssaslığı var və bu barədə mövcud məlumatlar diqqətlə araşdırılmalıdır. Antibiotiklərə qarşı dəri sınağına gəldikdə isə, hazırda dünyanın bir çox ölkəsində bu üsul tətbiq edilmir. Çünki həmin sınağın etibarlılığı təsdiqlənməyib və sınağın özü belə xəstədə anafilaktik şoka səbəb ola bilər. Buna görə də allergiyanı əvvəlcədən müəyyənləşdirən universal bir metod yoxdur”.
O qeyd edib ki, əsas məsələ xəstənin düzgün qiymətləndirilməsidir:
"Əsas məsələ xəstənin düzgün qiymətləndirilməsidir. Onun həyat və xəstəlik tarixçəsində hər hansı allergik reaksiyanın olub-olmaması müəyyən edilməlidir. Əgər belə bir risk mövcuddursa, profilaktik tədbirlər görülməlidir. Belə hallarda xəstəyə əvvəlcədən desensibilizasiya məqsədilə müvafiq preparatlar vurulur, təxminən yarım saat müşahidə altında saxlanılır və yalnız bundan sonra antibiotik və ya digər dərman vasitələri tətbiq edilir”.
Professor vurğulayıb ki, xəstəxanalarda bu cür halların ağır nəticələrinin qarşısını almaq üçün bütün zəruri dərman vasitələri daim əlçatan olmalıdır:
"Xəstəxanalarda bu cür halların ağır nəticələrinin qarşısını almaq üçün bütün zəruri dərman vasitələri daim əlçatan olmalıdır. Xüsusilə prednizolon, deksametazon və digər antiallergik preparatlar, məsələn, difenhidramin (Dimedrol), suprastin, tavegil və analoji vasitələr həkimlərin istifadəsinə hazır vəziyyətdə saxlanılmalıdır. Belə vəziyyətlərdə həmin preparatlar dərhal venadaxili tətbiq edilməli, eyni zamanda infuzion terapiya aparılmalı və anafilaktik şokun aradan qaldırılması üçün bütün təxirəsalınmaz tibbi tədbirlər görülməlidir. Təəssüf ki, allergik reaksiyanın baş verəcəyini yüz faiz əvvəlcədən göstərən hər hansı etibarlı göstərici yoxdur. Lakin xəstənin allergik olduğu məlumdursa və ya bu barədə şübhə varsa, həmin şəxslərə münasibətdə daha diqqətli və ehtiyatlı davranmaq vacibdir”.
Şahanə Ziyad
