“Azərbaycan-Slavyan Gəncləri Assosiasiyası” İctimai Birliyi etiraz BƏYANATI yayıb.
Təşkilatdan AZXEBER.COM-a verilən məlumata görə bəyanatda deyilir.
«Ölkəmiz insan hüquq və əsas azadlıqlarının qorunmasına təminat kimi demokratik idarəetmə və vətəndaş cəmiyyətinin inkişaf etdirilməsini alternativsiz yol kimi seçmişdir.
Demokratik, hüquqi dövlətin qanunun aliliyi, insan hüquqları və sosial ədalət kimi fundamental əsaslarının möhkəmləndirilməsi Azərbaycan Respublikasının Prezidentinin daim diqqət mərkəzindədir.
Ötən illər ərzində Azərbaycan Respublikası insan hüquqları sahəsində fəaliyyət göstərən nüfuzlu beynəlxalq qurumlarla əməkdaşlığı inkişaf etdirmiş, insan hüquqlarının müdafiəsi sahəsində 50-dən çox beynəlxalq sənədə tərəfdar çıxmış və bu sahədə beynəlxalq öhdəliklərin həyata keçirilməsində mühüm nailiyyətlər əldə etmişdir.
Çox təəssüflə qeyd etmək lazımdır ki, bir neçə beynəlxalq və regional təşkilatlar öz bəyənatlarında ölkədəki faktiki vəziyyəti yox, məhz öz istəklərini qeyd etməyi daha vacib bilirlər. Bunu deməyə kifayət qədər ciddi əsaslarımız var. İstər Avropa Şurası olsun, istər “Amnesty İnternational”, istərsə də «Human Rights Watch» öz bəyənatlarında Azərbaycanı əsas hədəf kimi daha da qabardırlar. «Human Rights Watch» un erməni lobbisi tərəfindən idarə olunması faktı bir daha təsdiq edir ki, təşkilat öz fəaliyyətini absurd fərziyyələr üzərində qurub. Lakin Avropa Şurası kimi ciddi təşkilatın qeyri-ciddi, konkret faktlara əsaslanmadan bəyanatlarla çıxış etməsi qərəzdən başqa bir şey deyildir. Gəlin qonşu Gürcüstana nəzər salaq. Eks prezident Saakaşvilinin zamanında onlarla insan məhz siyasi baxışlarına görə həbs olundu. Nəticə isə ondan ibarətdir ki, AŞPA nəinki öz bəyanatlarında bunu xüsusi olaraq qeyd etmədi, hətta, onu Avropanın qəhrəmanına çevirdi. Digər bir fakt isə ondan ibarətdir ki, hal-hazırda qonşu Gürcüstanda 100-ə yaxın siyasi məhbus var. Onların siyahısına və sosial statuslarına nəzər yetirdikdə siyasi baxışlarına görə həbs olunduqlarının şahidi olursan. Çünki onların böyük əksəriyyəti jurnalist, QHT üzvü, bloqçü, hüquq müdafiəçisi statusunu daşıyırlar.
Biz “Azərbaycan-Slavyan Gəncləri Assosiasiyası” İctimai Birliyi olaraq ölkəmizə qarşı olan ikili münasibəti qətiyyən pisləyir, beynəlxalq təşkilatlardan daima ədalət gözlədiyimizi bəyan edirik.»
Səbuhi Abbasov
“Azərbaycan-Slavyan Gəncləri Assosiasiyası” İctimai Birliyinin təsisçisi və sədri
